काठमाडौं – दक्षिण कोरियामा जारी यूनाइटेड सिटी एण्ड लोकल गभर्नेन्स एसियाप्यासिफिक (UCLG ASPAC) को सम्मेलनबाट नेपाल नगरपालिका संघका अध्यक्ष एवं नीलकण्ठ नगरपालिकाका नगर प्रमुख भीम प्रसाद ढुंगाना पुनः अध्यक्षमा निर्वाचित हुनुभएको छ। यस पदमा पुनः निर्वाचित हुनु नेपालका स्थानीय सरकार र नेतृत्वको अन्तर्राष्ट्रिय स्तरमा बढ्दो प्रभाव र स्वीकार्यता प्रतीक मानिएको छ ।
ढुंगानाले यसअघि पनि यसै पदमा रहँदै नेपालका स्थानीय सरकारका आवाजलाई अन्तर्राष्ट्रिय मञ्चमा प्रभावकारी ढंगले उठाउँदै आएका थिए। पुनः निर्वाचित भएपछि उनले नेपालको नगर विकास, सहकारी नेतृत्व र शहरी दिगोपनाबारे अझै दृढतापूर्वक प्रस्तुत गर्ने प्रतिबद्धता व्यक्त गर्नुभएको छ ।
नेपाल नगरपालिका संघले यसलाई नेपालको गौरवपूर्ण उपलब्धि भनेको छ। संघका पदाधिकारीहरूको भनाइमा ढुंगानाको नेतृत्वले आगामी दिनमा अन्तर्राष्ट्रिय सहकार्य, अनुभव आदान–प्रदान र विकास साझेदारीलाई नयाँ स्तरमा पुर्याउने विश्वास गरिएको छ ।
स्थानीय तह सुदृढीकरण र विश्वव्यापी शहरी चुनौतीहरूको समाधानका लागि नेपाली प्रतिनिधि नेतृत्वद्वारा पाएको मान्यता नेपालको मात्र नभई सम्पूर्ण एसिया–प्यासिफिक क्षेत्रकै लागि महत्वपूर्ण कदम भएको विश्लेषणहरूको धारणा छ ।
