काठमाडौं- नेकपा एमालेका अध्यक्ष केपी शर्मा ओलीले अब टोल टोलमा टोल सुरक्षा समिति बनाएर अघि बढ्नु पर्ने बताएका छन् । देशैभरी असुरक्षा बढेकोले प्रहरीलाई सघाउन टोल सुरक्षा समिति आवश्यक रहेको ओलीले बताए ।
नेकपा एमाले सम्पर्क समन्वय कमिटीको भेटघाट तथा चियापान कार्यक्रमलाई शनिबार पार्टी केन्द्रीय कार्यालय च्यासलमा सम्बोधन गर्दै ओलीले अहिले मानिसहरू भित्र कायरता जगाएर राज्यलाई कमजोर बनाइ राज गर्ने प्रयत्न भएको बताए । यस्तो अवस्थामा जनताले आफ्नो सुरक्षा आफैले गर्नुपर्ने अवस्था आएको ओलीले बताए ।
सरकारले समातेका अपराधिलाई छाड भन्ने अनि राजनीतिक नेताहरूलाई गिरफ्तार गर भन्ने गरेको ओलीले सुनाए । ‘यस्तो अवस्थामा जनताले आफ्नो सुरक्षा आफैले गर्नु पर्यो, टोल टोलमा सुरक्षा समिति बनाउनै पर्यो’, उनले भने ।
ओलीले पार्टीका नेता कार्यकर्तालाई सत्यको अगाडि नझुक्न आग्रह गरे । ‘सत्य कुरा डटेर बोल्नुस्, बोल्न पाइन्छ, वाक स्वतन्त्रता हाम्रो नैसर्गिक अधिकार हो, बोल्ने गर्नुस्, अपराधीहरूले मनपरी बोल्न पाउने हामीले जायज कुरा बोल्न नपाउने भन्ने हुँदैन, साथीहरू बोल्ने गर्नुस्’, ओलीले भने ।
ओलीले तिहारमा औँसीको अँध्यारो रातलाई उज्यालोले चिर्न बत्ती बालिने बताउँदै अहिले देशमा छाएको अँध्यारोलाई पनि उज्यालो बालेर चिर्नु पर्ने बताए । ‘अहिले देशमा औँसीको अँध्यारो छाएको छ, यो स्याहा सरकार हो, यो स्याहा सरकारका विरुद्ध हामीले उज्यालो बाल्नै पर्दछ, ज्योति बाल्नै पर्दछ, उज्यालो बाल्नै पर्दछ’, ओलीले भने ।
ओलीले अहिले देशमा चुनावका स्थिति नभएको पनि बताए । त्यसैले एमालेले विघटित संसद्को पुर्नस्थापनाको माग उठाएको बताए । जेलबाट भागेका अपराधी र लुटिएका हतियार फिर्ता नभएसम्म चुनाव हुन नसक्ने उनको भनाइ छ । ‘कि सम्झौता छ अपराधीहरूसँग तपाईँहरूको, आफूहरूलाई सहयोग गर्ने भन्ने’, उनले भने ।
