काठमाण्डाै – प्रधानमन्त्री सुशीला कार्कीले प्रतिनिधिसभाको चुनावका लागि राजनीतिक वातावरण बनाउन आज दलहरूसँग छलफल गर्दै हुनुहुन्छ ।
प्रधानमन्त्री निवास बालुवाटारमा दिउँसो ४ बजे हुने छलफलमा सहभागी हुन सात राजनीतिक दललाई औपचारिक पत्र पुगेको र टेलिफोनबाट पनि सम्पर्क भएको प्रधानमन्त्री कार्कीका प्रेस संयोजक रामबहादुर रावलले जानकारी दिनुभयो ।
कार्की प्रधानमन्त्री भएपछि पहिलो पटक राजनीतिक दलहरूसँग सामूहिक छलफल गर्न लाग्नुभएको हो । यसअघि राष्ट्रपति रामचन्द्र पौडेलले आह्वान गरेको सर्वदलीय बैठकमा भने प्रधानमन्त्री कार्की पनि सहभागी हुनुभएको थियो ।
नेपाली कांग्रेसले महामन्त्री गगन थापा र प्रवक्ता डाक्टर प्रकाशशरण महत जाने बताएको छ । नेकपा एमालेका महासचिव शङ्कर पोखरेल र उपमहासचिव प्रदीप ज्ञवाली सहभागी हुनुहुनेछ ।
नेकपा माओवादी केन्द्रले पम्फा भुसाल र वर्षमान पुनलाई पठाउँदैछ । राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्ले र सचिवालय सदस्य सोविता गौतम सहभागी हुनुहुनेछ ।
राष्ट्रिय प्रजातन्त्र पार्टी (राप्रपा) बाट महामन्त्री राजेन्द्र गुरुङ र प्रवक्ता मोहन श्रेष्ठ जानु हुने जनाएको छ । जसपा नेपालका अध्यक्ष उपेन्द्र यादव र कार्यकारिणी सदस्य प्रकाश अधिकारी तथा जनमत पार्टीका अध्यक्ष सीके राउत सहभागी हुने बताइएको छ ।
