काठमाडौं । नेपाली कांग्रेसभित्र तीव्र समयचापका कारण पार्टी अब विशेष महाधिवेशन भन्ने एक मात्र निर्णायक मोडतिर उन्मुख भएको केन्द्रीय सदस्य अजय सिवाकोटीले बताएका छन् ।
नियमित महाधिवेशन तोकिएको अवधिभित्र सम्पन्न नहुने अवस्था स्पष्ट हुँदै गएपछि कांग्रेससँग उपलब्ध विकल्प अत्यन्त सीमित रहेको उनको दाबी छ । विधानअनुसार केन्द्रीय समितिको निर्णयमार्फत विशेष महाधिवेशन बोलाउने वा ५५ प्रतिशत महाधिवेशन प्रतिनिधिको हस्ताक्षरका आधारमा आह्वान गर्ने-यिनै दुई उपायमध्ये कुनै एकलाई पार्टीले अब ढिला नगरी अंगिकार गर्नुपर्ने सिवाकोटीको निष्कर्ष छ ।
नेता सिवाकोटीका अनुसार संस्थापन पक्षले केन्द्रीय समितिमा बहुमतको बलमा विशेष महाधिवेशन टार्न सक्ने अवस्था समाप्तप्रायः भइसकेको छ । सार्वभौम महाधिवेशन प्रतिनिधिद्वारा आधिकारिक रूपमा बुझाइएको दस्तावेजले विधानतः विशेष महाधिवेशन गर्नैपर्ने बाध्यता सिर्जना गरिदिएको छ ।
सिवाकोटी भन्छन्, “यसलाई बेवास्ता गर्ने कुनै पनि प्रयास नैतिक, संस्थागत र वैधानिक रूपमा अस्वीकार्य मात्र होइन, पार्टीलाई थप जटिल दिशातिर धकेल्ने जोखिमसमेत बोकेको छ ।” महामन्त्री गगन थापाले पनि विशेष महाधिवेशनबाट निर्वाचित नेतृत्व नै निर्वाचन आयोगमा वैधानिक रूपमा दर्ता हुने र आगामी चुनावका उम्मेदवारलाई टिकटमा हस्ताक्षर गर्ने अधिकार त्यसै नेतृत्वले ग्रहण गर्ने स्पष्ट संकेत देइसकेका छन् ।
यो कुरा उल्लेख गर्दै सिवाकोटीले पार्टीको वैधता, संगठनात्मक एकीकृतता र चुनावी तयारीका दृष्टिले विशेष महाधिवेशन अब अपरिहार्य भइसकेको बताए । हाल कांग्रेसभित्रको बहस, वार्ता र राजनीतिक कूटनीति सबै विशेष महाधिवेशनकाे दिशामा केन्द्रीत बन्दै गएको सिवाकोटीको भनाइ छ ।
उनका अनुसार यसलाई पन्छाउने वा ढिलाइ गर्ने कुनै पनि निर्णय कांग्रेसको हितविपरीत मात्र होइन, संगठनलाई विभाजन तथा अविश्वासको संकटमा पुर्याउनेछ । सिवाकोटीले पार्टीका सबै सक्रिय सदस्य, नेतागण तथा महाधिवेशन प्रतिनिधिहरूलाई विशेष महाधिवेशनको तयारीमा जुट्न आग्रह गर्दै कांग्रेस अहिले निर्णायक मोडमा प्रवेश गरिसकेको टिप्पणी गरे ।
