काठमाडाँ । नेपाली कांग्रेसका केन्द्रीय सदस्य कल्याण गुरूङले विशेष महाधिवेशनबारे पार्टीभित्र फैलाइएको भ्रम र गलत व्याख्याप्रति कडा आपत्ति जनाएका छन् ।

१५ बुँदेमार्फत आफ्ना धारणा सार्वजनिक गर्दै उनले धारा १७(२) नेतृत्व परिवर्तनका लागि होइन, असाधारण नीतिगत परिवर्तनमा मात्र प्रयोग हुने स्पष्ट पारे ।

विशेष महाधिवेशनका लागि ४० प्रतिशत प्रतिनिधि हस्ताक्षर अनिवार्य हुने भएकाले तत्काल सनाखत–प्रमाणीकरण प्रक्रिया सुरु गर्न आग्रह गर्दै गुरूङले उपलब्ध हस्ताक्षर २५ प्रतिशतसम्म पनि नपुग्ने दाबी गरे ।

उनका अनुसार महामन्त्रीहरू स्वयंले विशेष महाधिवेशनलाई "बार्गेनिङ टुल" का रूपमा प्रयोग गरिरहेको बुझाइ पार्टीभित्र बलियो बनेको छ, जबकि राष्ट्रिय सभा गृहको भेलामा वास्तविक महाधिवेशन प्रतिनिधिको उपस्थिति अत्यन्त न्यून थियो । अग्रसर समूहभित्रै गम्भीर मतभेद बढेको र हस्ताक्षरविहीन विज्ञप्तिले अस्थिरता झनै बढाएको आरोप उनले लगाए ।

क्रियाशील सदस्यता टुंगो नलागेसम्म १५औं महाधिवेशन सम्भव नभएको दोहोर्‍याउँदै गुरूङले धारा ३३ अनुसार उम्मेदवार चयन, गठबन्धन नबनाउने नीति, र महाधिवेशन तयारीका सबै प्रक्रिया तत्काल अगाडि बढाउन जोड दिए। उनका शब्दमा, “विशेष महाधिवेशनको डर देखाएर कसैले स्वार्थ नमेटोस्; कांग्रेसमा डर मान्ने मान्छे कोही छैन।”