काठमाडौं । नेपाल श्रीलंका चेम्बर अफ कमर्स एन्ड इन्डस्ट्री (NSCCI) का पदाधिकारी र नेपालका लागि श्रीलंकाका एम्बेसडर रुवान्ती डेल्पिटियाबीच व्यापार, लगानी र संयुक्त उद्यम विस्तारसम्बन्धी महत्वपूर्ण भेटवार्ता सम्पन्न भएको छ ।
भेटघाट काठमाडौंको बुढानिलकण्ठस्थित श्रीलंका दूतावासमा सम्पन्न भएको हो । भेटमा NSCCI का माननीय सदस्य डा. राजेश काजी श्रेष्ठ, अध्यक्ष विजय श्रेष्ठ, महासचिव नरेन्द्र बल्लभ पन्त तथा सदस्य कुमार दाहाल उपस्थित थिए ।
एम्बेसडर डेल्पिटियाले दुई देशबीचका व्यावसायिक तथा आर्थिक गतिविधि आगामी दिनमा थप गतिशील हुने विश्वास व्यक्त गरिन् । विशेषगरी २०२६ को जुन महिनामा श्रीलंकामा आयोजना हुने ‘इन्डस्ट्रियल एक्स्पो’ मा नेपाली प्रतिनिधिमण्डल सहभागी हुने विषयमा दुवैतर्फको गम्भीर छलफल भयो ।
नेपालतर्फ पनि सोही प्रकृतिको व्यापारिक एक्स्पो आयोजना गरी श्रीलंकाका प्रतिनिधिलाई सहभागी गराउने तयारी भइरहेको चेम्बरका अध्यक्ष विजय श्रेष्ठले बताए । भेटमा व्यापार, लगानी, संयुक्त उद्यम, सेवा–बिनिमय, भ्रमण, व्यापारिक समूहहरूको आदान–प्रदान तथा दुवै देशका सम्भावित बजार र लगानी क्षेत्र विस्तार सम्बन्धी विषयमा विस्तृत चर्चा भयो ।
दुवै देशबीच हुने यस्तो उच्च–स्तरीय भ्रमण र समन्वयले स्थानीय तथा राष्ट्रिय आर्थिक गतिविधिमा थप ऊर्जा भर्ने, साथै विदेशी व्यापार तथा लगानी नीतिमा नियमित संवादका नयाँ ढोका खोल्ने अपेक्षा राखिएको छ ।
त्यसैगरी, नेपाल श्रीलंका चेम्बर अफ कमर्स एन्ड इन्डस्ट्री (NSCCI) को आगामी साधारणसभामा एम्बेसडर डेल्पिटिया प्रमुख अतिथिका रूपमा रहने विषयमा पनि प्रारम्भिक सहमति बनेको छ । यो भेटघाटलाई नेपाल–श्रीलंका आर्थिक तथा कूटनीतिक सहकार्य सुदृढीकरणको महत्वपूर्ण कदमका रूपमा हेरिएको छ ।
