विराटनगर । फागुन २१ गते हुने प्रतिनिधिसभा निर्वाचनका लागि नेपाली कांग्रेसको निर्वाचन क्षेत्रीय समितिले आफ्ना उम्मेदवार जिल्ला समितिलाई सिफारिस गरेको छ ।
मोरङका छ वटा निर्वाचन क्षेत्रमध्ये क्षेत्र नम्बर ६ मा डाक्टर र क्षेत्र नम्बर ३ मा डाक्टर सुनिल शर्माको नामशेखर कोइराला एकल उम्मेदवारका रूपमा प्रस्ताव गरिएको छ ।
यस्तै क्षेत्र नम्बर १ मा कांग्रेस मोरङका सभापति तथा पूर्वमन्त्री डिकबहादुर लिम्बू, उर्लाबारीका पूर्वप्रमुख तथा कांग्रेस कोशी प्रदेशका सहमहामन्त्री खड्ग फागो र नेतृ दिव्या बस्नेत सिफारिस भएका छन् । विघटित संसदमा लिम्बू नै निर्वाचित भएका थिए ।
यस्तै क्षेत्र नम्बर २ बाट पूर्वमन्त्रीसमेत रहेका डा. मीनेन्द्र रिजाल, प्रदेशसभाका पूर्वसांसद शिवनारायण सिंह र नेतृ नारायणी पण्डित सिफारिस भएका छन् ।
रिजाल २०७४ सालको निर्वाचनमा वाम गठबन्धनलाई पराजित गर्दै विजयी बनेका थिए, तर २०७९ सालको निर्वाचनमा उनले टिकट पाएनन् । उनको ठाउँमा सुजाता कोइरालाले टिकट पाएकी थिइन् । कांग्रेस–माओवादीसहित गठबन्धनबाट उम्मेदवार बनेकी कोइरालालाई एमालेका उम्मेदवार ऋषिकेश पोखरेलले पराजित गरेका थिए ।
यस्तै कांग्रेसले मोरङको क्षेत्र नम्बर ४ मा पूर्वमन्त्री महेश आचार्य, संविधानसभा सदस्य दिलीप गच्छदार, नेता गुरुराज घिमिरे र विनोद बस्नेतलाई सिफारिस गरेको छ ।
२०७४ सालको निर्वाचनमा आचार्यलाई वाम गठबन्धनका उम्मेदवार अमनलाल मोदीले पराजित गरेका थिए । गच्छदार २०७० सालको संविधानसभा निर्वाचनमा तत्कालीन क्षेत्र नम्बर ३ बाट विजयी बनेका थिए भने नेता घिमिरेलाई २०७९ सालको निर्वाचनमा सोही क्षेत्रको प्रदेशसभा निर्वाचन क्षेत्र १ बाट एमालेका जयप्रकाश चौधरीले पराजित गरेका थिए ।
२०७९ सालमा कांग्रेस र माओवादीबीच गठबन्धन थियो । सिफारिस भएका नेता विनोद बस्नेत विराटनगर ३ नम्बर वडाका पूर्व वडाध्यक्ष हुन् ।
यस्तै कांग्रेसले मोरङको क्षेत्र नम्बर ५ बाट हसन अन्सारी, राजेश गुप्ता, फुलकुमार लालवानी, फैयाज अहमद र निर्मला सुवेदीलाई सिफारिस गरेको छ । उनीहरूमध्ये सर्वसम्मतिको प्रयास भइरहेको जिल्ला सभापति डिकबहादुर लिम्बूले बताए ।
