काठमाडौं । आम जनता पार्टीले एलिजा गौतमलाई उपाध्यक्षको महत्वपूर्ण जिम्मेवारी सुम्पँदै संगठन सुदृढीकरण र जनआधारित राजनीतिको दिशामा दृढ र सकारात्मक सन्देश प्रवाह गरेको छ । अध्यक्ष प्रभु साहद्वारा गरिएको यो नियुक्तिलाई पार्टीभित्र मात्र नभई समग्र राजनीतिक वृत्तले समेत दूरदर्शी र समयानुकूल कदमका रूपमा स्वागत गरेको छ ।
उपाध्यक्ष गौतमले सार्वजनिक गर्नुभएको ९ बुँदे एजेन्डा विकास, सुशासन, सामाजिक न्याय र राष्ट्रिय हितमा स्पष्ट रूपमा केन्द्रित छ ।
भ्रष्टाचारविरुद्ध शून्य सहनशीलता, समयमै सेवा प्रवाह हुने प्रशासनिक संरचना र व्यक्तिगत स्वार्थभन्दा माथि उठेर राष्ट्रको हितलाई सर्वोपरि राख्ने उहाँको प्रतिवद्धताले आम जनता पार्टीलाई भरोसायोग्य वैकल्पिक राजनीतिक शक्तिका रूपमा स्थापित गर्ने बलियो आधार तयार गरेको छ ।
भुईँमान्छे, पीडित, मजदुर र महिलाका आवाजलाई केन्द्रमा राखेर अघि बढ्ने उहाँको दृष्टिकोणले पार्टीको राजनीति अभिजात वर्गसम्म सीमित नरही आम जनजीवनसँग प्रत्यक्ष रूपमा जोडिएको सन्देश दिएको छ । यसले पार्टीको वैचारिक धारलाई व्यवहारिक, समावेशी र जनउत्तरदायी बनाउँदै लैजाने स्पष्ट संकेत गरेको विश्लेषण गरिन्छ ।
महिला सशक्तिकरणमा निरन्तर क्रियाशील रहने प्रतिबद्धतासँगै नेतृत्व तहमा सक्षम महिलाको उपस्थिति विस्तार हुनु आफैंमा सकारात्मक राजनीतिक परिवर्तनको प्रतीक हो ।
यसले आम जनता पार्टीभित्र समावेशी नेतृत्व विकास र लैङ्गिक समानताप्रतिको दृढ दृष्टिकोणलाई अझ सुदृढ बनाएको छ । राजनीतिप्रति जनविश्वास कमजोर बन्दै गएको वर्तमान अवस्थामा, एलिजा गौतम जस्तो सामाजिक अभियन्ताको सक्रिय, स्पष्ट र जनमुखी भूमिकाले आम जनता पार्टीप्रति आशा र भरोसा थप्ने विश्वास गरिएको छ ।
उहाँको उपाध्यक्ष पदको जिम्मेवारी केवल औपचारिक पदमा सीमित नभई पार्टीको दीर्घकालीन जनआधारित राजनीति, संगठन विस्तार र राष्ट्रसेवाको अभियानलाई संस्थागत गर्ने महत्वपूर्ण दायित्वका रूपमा लिइएको छ ।
