काठमाडौं। नेत्रविक्रम चन्द ‘विप्लव’ नेतृत्वको नेकपा (माओवादी) ले आगामी निर्वाचनमा कुनै पनि दलसँग चुनावी गठबन्धन नगरी एक्लै प्रतिस्पर्धा गर्ने निर्णय गरेको छ।
काठमाडौंको बुद्धनगरमा जारी केन्द्रीय समितिको चौथो विशेष बैठकलाई सम्बोधन गर्दै पार्टी महासचिव विप्लवले कार्यकर्तालाई एक्लै निर्वाचन लड्ने तयारीमा जुट्न निर्देशन दिएका छन्।
उनले पार्टीभित्र वा बाहिर कसैसँग पनि चुनावी तालमेल गर्ने विषयमा हालसम्म कुनै आधिकारिक छलफल नभएको स्पष्ट पारे।
राष्ट्रिय तथा अन्तर्राष्ट्रिय परिस्थितिमा केही परिवर्तन आएको उल्लेख गर्दै विप्लवले पार्टी स्वतन्त्र रूपमा चुनाव लड्ने तयारीमा रहेको कुरा दोहोर्याए।
बैठकमा सम्बोधन गर्दै उनले प्रतिनिधिसभाका १६५ वटै निर्वाचन क्षेत्रमा एक्लै प्रतिस्पर्धा गर्ने र ११० जनाको समानुपातिक सूचीसमेत पेश गर्ने योजना रहेको बताए।
महासचिव विप्लवले बुद्धिजीवी, व्यवसायी, अवकाश प्राप्त कर्मचारी तथा विदेशमा रहेका सचेत राष्ट्रप्रेमी नेपालीलाई समेत समेट्दै करिब २५ प्रतिशत उम्मेदवार टुंग्याउने तयारी भइरहेको जानकारी दिए।
बैठकमा सहभागी जनपत्रकार संगठन नेपालका संस्थापक केन्द्रीय अध्यक्ष प्रकाश डुम्रेका अनुसार देशभरबाट करिब ३ सय नेताहरू काठमाडौंमा भेला भएका छन्।
