काठमाडौं । नेपाली कांग्रेसले आगामी राष्ट्रिय सभा निर्वाचनका लागि ९ जना उम्मेदवारको नाम टुंगो लगाएको छ । कांग्रेस, नेकपा एमाले र नेपाली कम्युनिस्ट पार्टीबीच चुनावी तालमेलबारे छलफल चलिरहेकै बेला कांग्रेसले सातै प्रदेशबाट चयन गरिएका उम्मेदवारको नाम सार्वजनिक गरेको हो ।

पार्टीका एक शीर्ष नेताका अनुसार कोशी प्रदेशबाट सुनिलबहादुर थापा (अन्य), मधेश प्रदेशबाट धर्मेन्द्र पासवान (दलित) र रन्जित कर्ण (अपांगता/अल्पसंख्यक) उम्मेदवार बनेका छन् । बागमती प्रदेशबाट गीता देवकोटा (महिला)लाई राष्ट्रिय सभा उम्मेदवार बनाउने निर्णय गरिएको छ ।

यसैगरी गण्डकी प्रदेशबाट जगत तिमिल्सिना (अन्य), लुम्बिनी प्रदेशबाट बासुदेव घिमिरे जंगली (अपांगता) र चन्द्रबहादुर केसी, कर्णाली प्रदेशबाट ललितजंग शाही (अन्य) तथा सुदूरपश्चिम प्रदेशबाट खम्मबहादुर खाती (अन्य) उम्मेदवार चयन भएका छन् । समावेशी प्रतिनिधित्व र प्रदेशगत सन्तुलनलाई ध्यानमा राखेर उम्मेदवार छनोट गरिएको कांग्रेसको भनाइ छ । माघ ११ गते हुने राष्ट्रिय सभा निर्वाचनका लागि आज मनोनयन दर्ताको कार्यक्रम तय गरिएको छ । निर्वाचन नजिकिँदै जाँदा दलहरूबीचको तालमेल र उम्मेदवारीले राजनीतिक माहोल थप तातेको छ ।