काठमाडौं । नेपाली कांग्रेसभित्र लामो समयदेखि चल्दै आएको आन्तरिक असन्तुष्टि अब निर्णायक चरणमा पुगेको छ। पार्टीका महामन्त्रीद्वय गगन थापा र विश्वप्रकाश शर्माले विधानको व्यवस्थाअनुसार विशेष महाधिवेशन आह्वान गर्दै पार्टी नेतृत्वलाई खुला चुनौती दिएका छन् । बुधबार संयुक्त वक्तव्य जारी गर्दै उनीहरूले वर्तमान राजनीतिक परिस्थितिमा पार्टीलाई संस्थागत र वैधानिक निकास दिन विशेष महाधिवेशन अपरिहार्य भइसकेको निष्कर्ष निकालेका छन् ।
महामन्त्रीद्वयको यो कदमलाई कांग्रेसभित्रको शक्ति सन्तुलन परिवर्तनतर्फको ठोस संकेतका रूपमा हेरिएको छ । विशेष महाधिवेशन आह्वानअघि थापा र शर्माले आजै विभिन्न बुद्धिजीवी, कानुनविद् र पार्टीसम्बद्ध विचारकहरूसँग गहन अन्तरक्रिया गरेका थिए । ती छलफलहरूबाट पार्टीको वैधानिक, संगठनात्मक र राजनीतिक भविष्य विशेष महाधिवेशनसँग प्रत्यक्ष जोडिएको निष्कर्ष निकालिएको बताइएको छ ।
यसैबीच, विशेष महाधिवेशन पक्षधर समूहले पनि छुट्टै पत्रकार सम्मेलन गर्दै अब विशेष महाधिवेशन विकल्प होइन, बाध्यता बनेको ठहरसहित विज्ञप्ति सार्वजनिक गरेको छ । उनीहरूले नेतृत्व तहबाट ढिलाइ र अनिर्णय भइरहे पार्टी थप संकटमा फस्ने चेतावनीसमेत दिएका छन् ।
राजनीतिक विश्लेषकहरूका अनुसार महामन्त्रीद्वयको संयुक्त पहलले कांग्रेसभित्रको आन्तरिक बहसलाई औपचारिक टकरावतर्फ लैजाने संकेत गरेको छ । यसले पार्टी सभापति शेरबहादुर देउवा नेतृत्वमाथि वैधानिक र नैतिक दबाब थप तीव्र बनाएको छ । अब प्रश्न एउटै छ-नेतृत्व विशेष महाधिवेशनतर्फ जान बाध्य हुन्छ कि पार्टीभित्रको यो द्वन्द्व अझ गहिरिँदै जान्छ? कांग्रेसको आगामी दिशा अब केही दिनभित्रै हुने निर्णयले स्पष्ट गर्नेछ ।
