सिराहा । नेपाली कांग्रेसका सभापति गगनकुमार थापाले मधेसको वर्तमान राजनीतिक माहोलले कांग्रेसले आगामी निर्वाचन जित्ने स्पष्ट संकेत गरिसकेको बताएका छन् ।
सिराहाको धनगढीमाइ नगरपालिका–बुद्धनगरमा आयोजित चुनावी कार्यक्रममा सम्बोधन गर्दै सभापति थापाले जेन–जीको विद्रोह र सुशासनको मागले नै अहिलेको चुनाव सम्भव भएको उल्लेख गरे ।
कार्यक्रममा बोल्दै थापाले मधेसका मतदाताप्रति आभार व्यक्त गर्दै भने, “तपाईंहरूले विश्वास गरेर बोलाउनुभयो । यहाँको माहोल देख्दा कांग्रेसले जित्नेछ भन्ने दृढ आशा लिएको छु । जिताएर पठाउनुहुन अनुरोध छ ।”
सभापति थापाले कांग्रेसले चुनाव दुई वर्षपछि हुने अपेक्षा गरे पनि जेन–जी पुस्ताले सुशासनको मागसहित विद्रोह गरेपछि समय अगावै निर्वाचन हुन पुगेको बताए । “हामीले त चुनाव दुई वर्षपछि आउला भन्ने सोचेका थियौँ, तर जेन–जीहरूले विद्रोह गर्नुभयो, सुशासन खोज्न थाल्नुभयो । त्यसैले चुनाव चाँडै आयो,” उनले भने, “कांग्रेसले यो चुनावको स्वागत गरेको छ । पार्टी नयाँ नेतृत्व छान्न तयार छ ।
अब भोट तपाईंहरूकै हातमा छ । जिताउनुहुन्छ भन्ने विश्वास लिएको छु ।” सभापति थापाले मधेसमा कांग्रेसप्रतिको समर्थन बढ्दै गएको दाबी गर्दै लोकतन्त्र, सुशासन र विकासका लागि कांग्रेस नै विश्वसनीय विकल्प भएको बताए ।
कार्यक्रमको क्रममा थापाले आज सप्तरीको हनुमाननगर, रुपनी र कदमचोक तथा सिराहाको लहान, जिरो माइल र गोलबजारमा समेत चुनावी सभालाई सम्बोधन गरेका थिए । यसअघि उनले मंगलबार सुनसरी निर्वाचन क्षेत्र नम्बर २ को झुम्कामा पनि कांग्रेसका नेताकार्यकर्तालाई सम्बोधन गरेका थिए ।
