बुटवल । रुपन्देही निर्वाचन क्षेत्र नं. २ मा चुनावी माहोल दिनप्रतिदिन तातेका बेला नेपाली काँग्रेसले रूपान्तरण र परिणाममुखी नेतृत्वको स्पष्ट सन्देश अघि सारेको छ ।
‘बद्लिएको काँग्रेस’ भन्ने नारालाई व्यवहारमा उतार्दै पार्टीले संगठन विस्तार, जनसम्पर्क र प्रत्यक्ष मतदाता संवादलाई प्राथमिकतामा राखेको छ ।
यस क्षेत्रबाट उम्मेदवारी दिएका वरिष्ठ उद्योगी तथा समाजसेवी चुन्नप्रसाद पौडेल विकास-केन्द्रित स्पष्ट एजेन्डासहित मतदातामाझ सक्रिय छन् ।
औद्योगिक अनुभव र सामाजिक योगदानलाई आधार बनाउँदै उनले रोजगारी सिर्जना, पूर्वाधार विकास र स्थानीय अर्थतन्त्रलाई चलायमान बनाउने लक्ष्य प्रस्तुत गरेका छन् ।
सार्वजनिक कार्यक्रमहरूमा बोल्दै पौडेलले लोकतान्त्रिक स्थायित्व, पारदर्शी शासन प्रणाली र उत्पादनमुखी अर्थतन्त्रमार्फत क्षेत्रको समग्र विकास सम्भव हुने धारणा राखेका छन् ।
उनले युवा पुस्ताको आकांक्षा र अपेक्षालाई सम्बोधन गर्ने कार्ययोजना अघि सार्दै “रोजगारी सिर्जना र उद्यम प्रवर्द्धन बिना दिगो समृद्धि सम्भव हुँदैन” भन्ने स्पष्ट सन्देश दिएका छन् ।
पार्टीका केन्द्रीय तथा क्षेत्रीय नेतृत्वले पछिल्लो राजनीतिक परिवेशपछि काँग्रेसले आत्मसमीक्षा गर्दै नीतिगत स्पष्टता र संगठनात्मक अनुशासनमा जोड दिएको बताएका छन् । चुनावपूर्व गठबन्धनभन्दा आफ्नै कार्यक्रम, दृष्टिकोण र योजनाका आधारमा जनमतमा जाने रणनीतिले कार्यकर्ता पंक्तिमा नयाँ ऊर्जा थपिएको उनीहरूको दाबी छ ।
नेपाली कांग्रेसका क्षेत्रीय सभापति प्रजापाल गिरीका अनुसार सबै वडामा प्रचार संरचना विस्तार भइसकेको छ भने टोलस्तरसम्म कार्यकर्ता परिचालनलाई तीव्रता दिइएको छ । विभिन्न वडामा आयोजित कार्यक्रमहरूमा स्थानीयको उल्लेख्य सहभागिताले चुनावी वातावरण थप उत्साहजनक बनेको छ ।
रुपन्देही-२ मा अहिले विकास, स्थायित्व र भरोसाको बहस केन्द्रमा छ । उद्योग र सामाजिक क्षेत्रमा स्थापित छविका कारण चुन्नप्रसाद पौडेलप्रति बढ्दो जनसमर्थनले यसपटकको निर्वाचन प्रतिस्पर्धालाई विशेष चासोको विषय बनाएको छ ।
