अर्घाखाँची । नेपाली कांग्रेसकी केन्द्रीय उपसभापति पुष्पा भुसालले युवालाई प्रविधिसँग जोडेर उत्पादन र उद्यमशीलतामा संलग्न गराउने स्पष्ट योजनाका साथ कांग्रेस यसपटकको निर्वाचनमा होमिएको बताउनुभएको छ ।
नेपाली कांग्रेस मालारानी गाउँपालिकाले खनदहमा बुधवार आयोजना गरेको अगुवा कार्यकर्ता भेटघाट कार्यक्रममा बोल्दै उपसभापति भुसालले कांग्रेसको मुख्य प्राथमिकता युवालाई स्वदेशमै रोजगारी र स्वरोजगारका अवसर सिर्जना गर्नु रहेको उल्लेख गर्नुभयो ।
“कांग्रेसको प्राथमिकता भनेको युवालाई प्रविधिसँग जोडेर स्वदेशमै रोजगारी र स्वरोजगार सिर्जना गर्नु हो,” उहाँले भन्नुभयो, “सूचना प्रविधि, कृषि आधुनिकीकरण, साना तथा मझौला उद्योग, पर्यटन तथा नवप्रवर्तनका क्षेत्रमा युवालाई अवसर दिने नीति अघि सारेका छौं।”उहाँले युवालाई विदेश पलायन गराउने होइन, स्वदेशमै सम्भावना खोजेर आत्मनिर्भर बनाउने नीति कांग्रेसले लिएको स्पष्ट पार्नुभयो ।
कार्यक्रममा नेपाली कांग्रेस लुम्बिनी प्रदेशका सहमहामन्त्री तथा अर्घाखाँचीका उम्मेदवार विष्णु प्रसाद खनाल (मुस्कान) ले अर्घाखाँचीमा कृषि, पर्यटन, पशुपालन र प्रविधिको माध्यमबाट युवालाई स्वरोजगार बनाउने प्रतिबद्धता व्यक्त गर्नुभयो । उहाँले युवाको विदेश पलायन रोक्न आफू संसदमा जान चाहेको उल्लेख गर्दै जनताको माग र भावनाअनुसार काम गर्ने वाचा गर्नुभयो ।
जिल्ला सभापति केशव श्रेष्ठ, समानुपातिक उम्मेदवार ललिता सुनार, कांग्रेस नेतृ निर्मला क्षेत्री, नेता सूर्य अधिकारीलगायतले पनि कार्यक्रमलाई सम्बोधन गर्नुभएको थियो ।
कार्यक्रम नेपाली कांग्रेस मालारानी गाउँपालिका सभापति शोभाखर खनालको सभापतित्व, सचिव रविन घिमिरेको सञ्चालन र तिलक खनालको स्वागत मन्तव्यमा सम्पन्न भएको थियो ।
यसैबीच, नेपाली कांग्रेस मालारानी गाउँपालिका वडा नम्बर ३ को बैठकले वडा सभापति तिलक खनालको संयोजकत्वमा १ सय १ सदस्यीय प्रचारप्रसार समिति गठन गरेको जनाएको छ । निर्वाचन लक्षित गतिविधि तीव्र पार्ने निर्णयसहित बैठक सम्पन्न भएको हो ।
