चितवन- राष्ट्रिय स्वतन्त्र पार्टी (रास्वपा) का सभापति रवि लामिछाने आगामी फागुन ४ गते सोमबार आफ्नै निर्वाचन क्षेत्रका विभिन्न वडाहरूमा पुग्ने भएका छन्।
मतदातासँगको सम्बन्धलाई थप सुदृढ बनाउन र स्थानीय समस्याबारे जानकारी लिन उनले ‘जनसम्पर्क तथा घण्टी अभिवादन कार्यक्रम’ आयोजना गर्न लागेका हुन्।
पार्टीले सार्वजनिक गरेको नयाँ कार्यतालिका अनुसार सभापति लामिछानेको दौडाहा बिहानैदेखि साँझसम्म चल्नेछ। कार्यक्रमको सुरुवात बिहान ८ बजे कालिका नगरपालिका वडा नम्बर १ बाट हुनेछ। त्यसलगत्तै उनी कालिका-३ र इच्छाकामना गाउँपालिकाको वडा नम्बर ७ मा पुग्ने तालिका रहेको छ।
भरतपुरका वडामा विशेष केन्द्रित
दिनभरिको कार्यतालिका अनुसार लामिछानेले भरतपुर महानगरपालिकाका धेरैजसो वडाहरूमा समय खर्चिनेछन्। बिहान ११ बजे भरतपुर-११ बाट सुरु हुने उनको यात्रा क्रमशः वडा नं. १२, १०, १, २, ३, ४, ५ र ६ हुँदै अघि बढ्नेछ।
यो विशेष अभियानको समापन साँझ ४:४५ बजे वडा नम्बर ७ मा पुगेर हुने रास्वपाले जनाएको छ। निर्वाचनपछि पनि जनप्रतिनिधि र जनताबीचको दूरी कम गर्ने उद्देश्यले यो अभियान सञ्चालन गरिएको हो।
कार्यक्रममा स्थानीयले आफ्ना समस्या, सुझाव र गुनासा सिधै सभापति लामिछानेसँग राख्न पाउनेछन्।
