काठमाडौं । नेपाली कांग्रेसका उपसभापति विश्वप्रकाश शर्माले मुलुकको वर्तमान राजनीतिक अवस्थाबारे गम्भीर समीक्षा आवश्यक रहेको बताएका छन् ।
बुधबार जनकपुरधाममा पार्टीले आयोजना गरेको प्रतिज्ञासभालाई सम्बोधन गर्दै शर्माले ०८४ मा हुनुपर्ने निर्वाचन ०८२ मै किन हुन लागेको हो ? भन्ने विषयमा स्पष्टता आवश्यक रहेको बताए ।
अहिलेको विषम परिस्थितिमा कसलाई जिताउने भन्दा पनि मुलुकलाई कसले सम्हाल्न सक्छ ? भन्ने मूल प्रश्न भएको शर्माको भनाइ छ । मधेसलाई देशको अन्नको भण्डारका रूपमा व्याख्या गर्दै शर्माले यहाँका किसानप्रति आभार व्यक्त गरे ।
देश र मधेस दुवै पीडामा रहेको उल्लेख गर्दै शर्माले समाधान खोज्न राजनीतिक दलहरूले गम्भीर आत्मसमीक्षा गर्नुपर्ने बताए । विशेष महाधिवेशनमार्फत कांग्रेस रुपान्तरण भएर आएको भन्दै शर्माले पहाड, तराई र हिमाल क्षेत्रमा देखिएका समस्याको समाधानको प्रतिज्ञा गर्न मधेस आएको बताए ।
यस्तो छ शर्माको भनाइ :
यो मधेस हामी सबै नेपालीको पेटमा अन्न पुर्याउने उर्वर भूमि हो । हामी मधेसका सबै आदरणीय किसान र किसानको पसिना तथा किसानले उत्पादन गरेको अन्नको एक-एक दानाप्रति कृतज्ञता व्यक्त गर्नको लागि यहाँ आएका छौँ । अहिले देशलाई दुखिरहेको छ, मधेसलाई दुखिरहेको छ । यो बेला मूल प्रश्न कसलाई जिताउने भन्ने होइन । यो विषम परिस्थितिमा मुलुकलाई कसले सम्हाल्न सक्छ भन्ने मुल प्रश्न हो । ०८४ मा हुनुपर्ने निर्वाचन ०८२ मै किन हुँदै छ ? नेपाली कांग्रेस आज पहाड, तराई, हिमाल कहाँ-कहाँ कसलाई दुखेको छ ? त्यसको समाधान के हुनसक्छ भनेर विशेष महाधिवेशनमार्फत एमआरआई गरेर आज मधेशमा प्रतिज्ञा गर्न आएको छ ।
