अर्घाखाँची । नेपाली कांग्रेसका प्रतिनिधिसभा सदस्य पदका उम्मेदवार विष्णुप्रसाद खनाल ‘मुस्कान’ले गच्छे-भालुवाङ सडकलाई समयमै कालोपत्रे गर्न आवश्यक बजेटको प्रबन्ध मिलाउने प्रतिबद्धता व्यक्त गरेका छन् ।
नेपाली कांग्रेस ढिकुरा गाउँ कार्य समितिले शनिवार आयोजना गरेको चुनावी कोणसभालाई ढिकुराको चौतारा र डेभाको सौतीपोखरामा सम्बोधन गर्दै उम्मेदवार मुस्कानले सानडेभाहुँदै खाँचीकोट जोड्ने मोटरबाटो तथा डेभाहुँदै पुत्के-डढुवा-पाकु जोड्ने सडकलाई विशेष प्राथमिकतामा राखेर अघि बढ्ने बताए ।
उनले नुवाकोट, ढिकुरा, धनचौर लगायत जिल्लाभर स्वास्थ्य, शिक्षा, खानेपानी र आधारभूत पूर्वाधार विकासलाई पहिलो प्राथमिकतामा राखेर काम गर्ने प्रतिबद्धता जनाए । “विकासलाई परिणाममुखी र समयबद्ध बनाइनेछ,” उनले भने ।
कार्यक्रममा नेपाली कांग्रेसका केन्द्रीय सदस्य कमलप्रसाद भुसाल, महासमिति सदस्य लेखनाथ पोखरेल, महाधिवेशन प्रतिनिधि चन्द्रा गैरे, जिल्ला सदस्य सूर्यप्रसाद भुसाल र हरिप्रसाद दमासे, भूमिकास्थान नगर सभापति खडानन्द बेल्बासे, युवा नेता राजकुमार श्रेष्ठ, ढेकुराका पूर्व सभापति उमेश घिमिरे, विष्णुप्रसाद मरासिनी, पूर्व जिल्ला सदस्य पूर्णबहादुर शाहीलगायत नेता–कार्यकर्ताको उपस्थिति रहेको थियो ।
वडा सभापति रामप्रसाद घिमिरे ‘तीर्थ’को सभापतित्व र जीवन घिमिरेको सञ्चालनमा सम्पन्न कार्यक्रममा भातृ संगठनका प्रतिनिधि, क्रियाशील सदस्य तथा सयौं कांग्रेस कार्यकर्ताको उल्लेख्य सहभागिता रहेको थियो ।
