चितवन । तीन दशकभन्दा बढी समयदेखि महिला, बालबालिका तथा घरेलु हिंसाका पीडितहरूको उद्धारमा समर्पित रहँदै आएकी समाजसेवी मीना खरेल यतिबेला चितवन निर्वाचन क्षेत्र नम्बर–२ बाट प्रतिनिधिसभा सदस्यका लागि नेपाली कांग्रेसको उम्मेदवार बनेर चुनावी प्रतिस्पर्धामा उत्रिएकी छन्।
भरतपुर महानगरपालिका–४ की ५४ वर्षीया खरेलले आफ्नो लामो सामाजिक यात्रालाई अब नीतिगत नेतृत्वमार्फत अझ प्रभावकारी बनाउने लक्ष्य राखेकी छन्। चितवनमा उनको परिचय केवल राजनीतिक उम्मेदवारको मात्र नभई संकटमा परेका महिला र असहाय बालबालिकाको भरपर्दो सहाराका रूपमा स्थापित छ।
‘आदर्श गृह’ र ‘हाम्रो घर’ जस्ता संस्थामार्फत उनले वर्षौंदेखि हिंसापीडित, बहुविवाहबाट प्रभावित तथा अभिभावकविहीन बालबालिकाको संरक्षण, पुनर्स्थापना र सशक्तीकरणमा सक्रिय भूमिका खेलेकी छन्।
समाजशास्त्रमा स्नातकोत्तर खरेल विद्यार्थी जीवनदेखि नै सामाजिक न्यायका मुद्दामा आवाज उठाउँदै आएकी थिइन्। शुल्कवृद्धि विरोध आन्दोलनमा सहभागी हुँदा प्रहरी हिरासतसमेत भोगेकी उनले २०४६ सालको जनआन्दोलनमा नेविसंघमार्फत सक्रिय योगदान दिएकी थिइन्।
२०५४ सालमा स्थानीय तहमा महिला वडा सदस्य निर्वाचित भएर जनप्रतिनिधिको अनुभव बटुलेकी उनी यसपटक पहिलोपटक संघीय संसदीय मैदानमा उत्रिएकी हुन्। चितवन–२ मा अघिल्ला निर्वाचनमा स्थापित राजनीतिक प्रभाव रहेकाले यसपटकको प्रतिस्पर्धालाई धेरैले अर्थपूर्ण रूपमा हेरिरहेका छन्।
‘राजनीतिक लोकप्रियता’ र ‘सामाजिक सेवा’ बीचको बहसका रूपमा चित्रित यस निर्वाचनमा खरेलले आफ्नो रैथाने सम्बन्ध, स्पष्ट वक्तृत्वकला, तार्किक प्रस्तुति र सामाजिक अभियानको अनुभवलाई मुख्य आधार बनाएकी छन्।
विशेषगरी पीडित महिलालाई सीपमूलक तालिममार्फत आत्मनिर्भर बनाउने उनको पहलले स्थानीय समुदायमा सकारात्मक प्रभाव पारेको छ। यस चुनावलाई केवल दलगत प्रतिस्पर्धा मात्र नभई सामाजिक न्याय, महिला सशक्तीकरण र सेवा–आधारित नेतृत्वको परीक्षणका रूपमा समेत व्याख्या गरिएको छ।
फागुन २१ को मतदानले चितवन–२ मा सामाजिक अभियानबाट उदाएकी नेतृ मीना खरेलको राजनीतिक यात्रालाई नयाँ उचाइ दिन्छ कि दिँदैन भन्ने निर्णय गर्नेछ।
