नुवाकोट l प्रतिनिधिसभा सदस्यका उम्मेदवार जगदीश्वर नरसिंह केसीले आसन्न निर्वाचन नजिकिँदै जाँदा नुवाकोटबासी मतदातासमक्ष भावनात्मक तथा विकासमुखी अपिल गर्नुभएको छ ।
निर्वाचन आउन अब मात्र १० दिन बाँकी रहेको उल्लेख गर्दै उहाँले परिपक्व अनुभव, स्पष्ट भिजन र सुशासनयुक्त नेतृत्व चयन गर्ने समय आएको बताउनुभयो । केसीले आफ्नो ३० वर्ष लामो राजनीतिक तथा सामाजिक यात्रालाई स्मरण गर्दै नुवाकोटको धुलो–माटोसँग जोडिएको अनुभवी नेतृत्वको आवश्यकता औंल्याउनुभयो ।
उहाँका अनुसार आगामी पाँच वर्ष नुवाकोटको समग्र विकासको मार्गचित्र कोर्ने महत्वपूर्ण समय भएकाले ‘रुख’ चिन्हमा मतदान गर्न आग्रह गर्नुभएको हो । किन ‘रुख’ चिन्ह? केसीले आफ्नो प्रतिबद्धतामा समावेशी विकासलाई प्राथमिकतामा राख्नुभएको छ ।
दलित, अपाङ्गता भएका व्यक्ति तथा पछाडि पारिएका वर्गको अधिकार सुनिश्चित गर्ने, युवालाई वैदेशिक रोजगारीको बाध्यताबाट मुक्त गराई नुवाकोटमै उद्योग, कृषि र स्वरोजगारका अवसर सिर्जना गर्ने उहाँको मुख्य एजेन्डा रहेको छ । त्यस्तै अभियानअन्तर्गत भ्रष्टाचारमुक्त समाज, पारदर्शी शासन प्रणाली र उत्तरदायी नेतृत्व स्थापना गर्ने प्रतिबद्धता पनि व्यक्त गर्नुभएको छ ।
“अवस्था बदल्ने संकल्प” “विदुरका गल्लीदेखि म्यागङका पाखासम्म, किस्पाङका आलुबारीदेखि बेलकोटगढीका फाँटसम्म- हामी सडक मात्र होइन, प्रत्येक नागरिकको अवस्था बदल्ने संकल्पका साथ तपाईँहरूको दैलोमा छौँ,” केसीले अपिलमा उल्लेख गर्नुभएको छ ।
उहाँले आगामी २०८२ फागुन २१ गते हुने निर्वाचनमा ‘रुख’ चिन्हमा मतदान गरी आफूलाई विजयी गराउन सम्पूर्ण नुवाकोटबासीमा अनुरोध गर्नुभएको छ । “१० दिनको पर्खाइ, ५ वर्षको सुखद गन्तव्य-रुख चिन्हमा मतदान गरी जगदीश्वरलाई जिताऔँ!”
