दोलखा – दोलखाको तामाकोशी गाउँपालिका–जफेमा आयोजित नेपाली कांग्रेसको चुनावी सभामा एमाले र नेकपा परित्याग गरी थुप्रै नेता तथा कार्यकर्ता कांग्रेसमा प्रवेश गरेका छन्।
बागमती प्रदेशका पूर्व अर्थमन्त्री कुन्दनराज काफ्लेको गृहगाउँ जफेमा आयोजित विशेष सभाले कांग्रेसतर्फ आकर्षण बढेको संकेत दिएको छ। एमालेबाट सविन तामाङ, बामबहादुर महत, लालबहादुर विक र भिम गुरुङ लगायतका नेता–कार्यकर्ता कांग्रेसमा प्रवेश गरेका छन्।
त्यस्तै, नेकपाबाट रामचन्द्र गुरुङ, धनबहादुर कटुवाल र लालबहादुर गुरुङ तथा ‘जेन–जी’ युवा समूहका राजेश खड्का लगायतका युवाहरू पनि कांग्रेसमा आबद्ध भएका छन्। नवप्रवेशीहरूलाई प्रतिनिधिसभा सदस्यका उम्मेदवार अजयबाबु शिवाकोटी, पूर्व अर्थमन्त्री कुन्दनराज काफ्ले र दोलखा कांग्रेसका सभापति वर्मा लामाले खादा तथा माला लगाएर स्वागत गरेका थिए।
सभालाई सम्बोधन गर्दै उम्मेदवार शिवाकोटीले आफू र काफ्लेबीचको सम्बन्धलाई लिएर फैलाइएका अफवाहहरूको खण्डन गरे। “चुनावका बेला अनेक अफवाह फैलाइन्छन्, तर कुन्दनजी र म दाजुभाइ सरह छौँ। राजनीतिमा सहकार्य पनि हुन्छ भन्ने नबुझेकाहरूले मात्र लडाइँको कुरा गर्छन्।
हाम्रो आस्था, विचार र दृष्टि एउटै छ,” उनले भने। शिवाकोटीले संविधान र लोकतन्त्रको रक्षा गर्न कांग्रेसले सधैँ नेतृत्वदायी भूमिका खेलेको उल्लेख गर्दै त्यसैको निरन्तरताका लागि आफूहरू चुनावी मैदानमा रहेको बताए।
उनले मतदातालाई पैसामा किन्न खोज्ने प्रवृत्तिबाट सचेत रहन आग्रह गर्दै मतदानको दिनसम्म सक्रिय अभियान चलाउन कार्यकर्तालाई निर्देशन दिए। पूर्व अर्थमन्त्री कुन्दनराज काफ्लेले दोलखाको समग्र विकास र सुशासनका लागि अजयबाबु शिवाकोटीलाई विजयी गराउन आग्रह गरे।
उनले भ्रष्टाचार निर्मूल गरी जनताले परिवर्तनको अनुभूति गर्ने वातावरण सिर्जना गर्ने प्रतिबद्धता व्यक्त गरे। जिल्ला सभापति वर्मा लामाले दोलखा कांग्रेस अहिले पूर्ण रूपमा एकढिक्का भएको दाबी गर्दै परिवर्तन र स्थायित्वका लागि ‘रुख’ चुनाव चिह्नमा मतदान गर्न आह्वान गरे।
