अर्घाखाँची l प्रतिनिधिसभा निर्वाचन नजिकिँदै जाँदा अर्घाखाँचीमा कांग्रेस उम्मेदवार विष्णुप्रसाद खनाल ‘मुस्कान’को पक्षमा समर्थन विस्तार हुँदै गएको दाबी गरिएको छ ।

स्थानीय राजनीतिक वृत्तमा ‘मुस्कान’प्रति सकारात्मक माहोल देखिएको बताइन्छ । विगतको आधार, वर्तमानको संकेत २०७९ सालको निर्वाचनमा एमालेका टोपबहादुर रायमाझी ४२,६७५ मतसहित विजयी हुँदा कांग्रेसकी पुष्पा भुसाल ४०,९४५ मतसहित झिनो अन्तरले पराजित भएकी थिइन् ।

१,७३० मतको अन्तरले जिल्लामा कांग्रेसको बलियो जनाधार रहेको स्पष्ट पारेको थियो । पछिल्लो राजनीतिक घटनाक्रम, विशेषगरी भुटानी शरणार्थी प्रकरणपछि एमालेभित्र देखिएको असन्तुष्टि र आन्तरिक विवादले मत समीकरणमा प्रभाव पार्न सक्ने विश्लेषण गरिएको छ ।

त्यस्तै, रास्वपाको ‘घण्टी’ चिन्हप्रति देखिएको प्रवेशले परम्परागत मत आधारमा फेरबदल ल्याउन सक्ने अनुमान गरिएको छ । कांग्रेस अर्घाखाँचीका पूर्वसभापति तथा लुम्बिनी प्रदेश सह–महामन्त्री ‘मुस्कान’ लामो समयदेखि संगठन निर्माणमा सक्रिय रहँदै आएका छन् ।

नेविसंघबाट राजनीतिक यात्रा सुरु गरेका उनले जिल्लाका ६१ वटै वडामा संगठन सुदृढीकरणमा जोड दिएका छन् । हाल उनी गाउँ–गाउँ र टोल–टोलमा पुगेर मतदातासँग प्रत्यक्ष संवादमा छन् ।

मतदाताको भनाई अनुसार विकास, सुशासन र स्थानीय मुद्दालाई प्राथमिकतामा राख्दै अघि बढेका कारण ‘मुस्कान’प्रति विश्वास बढेको छ । बदलिँदो राजनीतिक माहोल स्थानीय तहमा कांग्रेसको सक्रिय उपस्थिति, साझा मुद्दामा देखिएको प्रतिबद्धता र पार्टीभित्रको एकताले पनि जनाधार विस्तार भएको दाबी गरिएको छ।

केही राजनीतिक विश्लेषकहरूका अनुसार यसपटक मतदाताको झुकाव परिवर्तनतर्फ देखिएको छ, जसले निर्वाचन परिणाममा निर्णायक भूमिका खेल्न सक्छ ।

एमालेका उम्मेदवार पीताम्बर भुसालसँग प्रतिस्पर्धामा रहेका ‘मुस्कान’को पक्षमा बढ्दो समर्थन, विपक्षी दलभित्रको असन्तुष्टि र नयाँ राजनीतिक समीकरणका संकेतले अर्घाखाँचीको चुनावी प्रतिस्पर्धा थप रोचक बनेको छ ।

निर्वाचन मिति नजिकिँदै जाँदा जिल्लाको राजनीतिक तापक्रम झन् बढिरहेको छ ।