काठमाण्डाै – गृहमन्त्री ओमप्रकाश अर्यालले भोलि हुने चुनावका लागि देशभर पूर्ण सुरक्षाको प्रत्याभूति गरिएको बताउनुभएको छ । चुनाव स्वच्छ, स्वतन्त्र र भयमुक्त वातावरणमा सम्पन्न गर्न सरकारले सम्पूर्ण तयारी पूरा गरेको उहाँको भनाइ छ ।
गृहमन्त्री अर्यालले मतदातालाई ढुक्क भएर मतदानमा सहभागी हुन अपील गर्नुभएको छ । सरकारले एकीकृत सुरक्षा योजना पारित गरी त्यसकै आधारमा सुरक्षा संयन्त्रहरू परिचालन गरिसकेको छ र देशभरका सबै मतदान स्थलहरूमा सुरक्षाकर्मीहरू पुगिसकेका छन् ।
मतदानपछि मतपेटिका ढुवानीका लागि पनि स्पष्ट मापदण्ड तयार गरिएको छ । गाडीमा अगाडि चालक र मतदान अधिकृत, बीचमा मतपेटिका, त्यसपछि प्रहरी र सबैभन्दा पछाडि उम्मेदवारका प्रतिनिधि रहने व्यवस्था छ । मतपेटिका बोकेको गाडीलाई नेपाल प्रहरी र सशस्त्र प्रहरीले स्कर्टिङ गर्नेछन् र आवश्यक परेमा नेपाली सेनाले पनि सहयोग गर्ने व्यवस्था मिलाइएको छ ।
चुनावमा उच्छृङ्खल गतिविधि गर्नेमाथि कडा कारबाही हुने गृहमन्त्रीले स्पष्ट पार्नुभएको छ । उहाँले भन्नुभयो, ‘त्यस्ता गतिविधि देखिए हामी नियन्त्रणमा मात्र लिँदैनौँ । कानूनी कारबाही गर्छौँ, अनुसन्धान र अभियोजन गरेर अदालतमा पेश गर्छौँ । दोषीहरू दण्डको भागिदार बन्नुपर्छ ।’
