काठमाडौं । बीबीसी नेपाली सेवाको जागिर छाडेर राजनीतिमा होमिएका रवीन्द्र मिश्रले लगातार तेस्रोपटक हार व्यहोरेका छन् ।
०७४ सालदेखि काठमाडौं क्षेत्र नम्बर–१ बाट संसदीय निर्वाचन लड्न सुरु गरेका उनी यसपालि तेस्रोचोटि पराजित भएका हुन् ।
पहिलोपल्ट उनी विवेकशील साझा पार्टीबाट उमेदवार बनेका थिए । पछिल्ला दुई चुनावमा उनले राष्ट्रिय प्रजातन्त्र पार्टी (राप्रपा)बाट प्रतिस्पर्धा गरेका हुन् । प्रत्येकपटक उनको मत संख्या घट्दै गएको छ ।
काठमाडौं–१ मा यसपटक राष्ट्रिय स्वतन्त्र पार्टी (रास्वपा)की उमेदवार रञ्जु न्यौपाने ‘दर्शना’ भारी मतान्तरसहित निर्वाचित भएकी छन् । उनले १५ हजार ४५५ मत प्राप्त गरिन् ।
नेपाली कांग्रेसका उमेदवार प्रवल थापा ६ हजार ३६४ मतसहित दोस्रो भएका छन् । मिश्र भने तीन हजार ९७२ मतसहित तेस्रो हुन पुगेका छन् ।
मिश्र ०७९ को चुनावमा कांग्रेसका प्रकाशमान सिंहसँग झिनो मतान्तरले हारेका थिए । सिंहले सात हजार १४३ मत पाएका थिए । मिश्र सात हजार ११ मत अर्थात् १३२ को झिनो मतान्तरमा दोस्रो भएका थिए ।
त्यसअघि, ०७४ को निर्वाचनमा पनि मिश्र सिंहसँगै पराजित भएका थिए । त्यस बेला सिंहले १० हजार ९३६ मत पाएका थिए । मिश्रले १० हजार ११८ मत ल्याएका थिए ।
०७४ देखि लगातार दोस्रो हुँदै सम्मानजनक मत ल्याएका मिश्र ०८२ मा भने तेस्रो स्थानमा पुगेका हुन् ।
