बाँके । प्रतिनिधि सभा सदस्य निर्वाचन अन्तर्गत बाँके निर्वाचन क्षेत्र नम्बर ३ मा नेपाली कांग्रेसका तर्फबाट उम्मेदवार बनेका अमर पुनले मतदाता, समर्थक तथा पार्टी कार्यकर्ताप्रति हार्दिक आभार व्यक्त गरेका छन् ।
उनले निर्वाचनमा आफूलाई उम्मेदवारका रूपमा सहभागी हुने अवसर प्रदान गर्ने सम्पूर्ण मतदाता, आम नागरिक, पार्टी नेतृत्व तथा साथीहरूलाई हृदयदेखि नै कृतज्ञता व्यक्त गरेका छन्।
अपेक्षित सफलता हासिल गर्न नसके पनि मतदाताले देखाएको विश्वास, माया र समर्थन आफ्नो लागि ठूलो प्रेरणा बनेको उनले बताएका छन् । मतदानमार्फत साथ दिने सबै नागरिकलाई धन्यवाद दिँदै उनले निर्वाचन अभियानमा दिनरात खटिएका पार्टीका कार्यकर्ता, शुभेच्छुक तथा सहयोगीहरूको योगदानप्रति विशेष आभार प्रकट गरेका छन् ।
यसैबीच, निर्वाचनमा प्रतिस्पर्धा गरेका सम्पूर्ण दलका उम्मेदवारप्रति सम्मान व्यक्त गर्दै बाँके–३ बाट विजयी भएका खगेन्द्र सुनारलाई हार्दिक बधाई तथा सफल कार्यकालको शुभकामना दिएका छन् ।
निर्वाचनमा केही प्राविधिक तथा परिस्थितिजन्य कारणका कारण अपेक्षित परिणाम प्राप्त गर्न नसकेको उल्लेख गर्दै उनले आगामी पाँच वर्षसम्म पनि नागरिकको सेवा, सहयोग र क्षेत्रको विकासका लागि निरन्तर समर्पित रहने प्रतिबद्धता व्यक्त गरेका छन् ।
साथै, उनले भोलिदेखि “नागरिक धन्यवाद” कार्यक्रम सञ्चालन गर्ने जानकारी दिँदै वडा–टोलमा पुगेर मतदातासँग प्रत्यक्ष भेटघाट गर्दै आभार व्यक्त गर्ने बताएका छन् । अन्त्यमा उनले वर्तमान परिस्थितिमा संयम, धैर्यता र एकताको भावनासहित संगठनलाई अझ सुदृढ बनाउन सक्रिय रूपमा लाग्न सम्पूर्ण कार्यकर्ता तथा शुभेच्छुकहरूलाई आग्रह गरेका छन् ।
