काठमाडौं l नेपाली कांग्रेस केन्द्रीय कार्यसमितिको बैठक सभापति गगनकुमार थापाको सभापतित्वमा आज ललितपुरस्थित पार्टीको केन्द्रीय कार्यालय बी.पी. स्मृति भवनमा सम्पन्न भएको छ।
बैठकको प्रारम्भ सभापति थापाको मन्तव्यबाट भएको थियो भने महामन्त्री प्रदीप पौडेलले विभिन्न समसामयिक र संगठनात्मक प्रस्तावहरू प्रस्तुत गरेका थिए। बैठकमा सुशासन स्थापना, संविधान संशोधनका लागि विज्ञसहितको अध्ययन समिति गठन, तथा पार्टीको १५औं महाधिवेशनको कार्यतालिकाबारे महत्वपूर्ण छलफल अघि बढाइएको छ।
साथै केन्द्रीय निर्वाचन समिति गठन, प्रतिनिधि सभा सदस्यहरूको अभिमुखीकरण, र क्रियाशील सदस्यता वितरण तथा अद्यावधिक अभियानलाई पनि प्राथमिकतामा राखिएको छ।
त्यसैगरी प्रदेश तथा स्थानीय सरकारको कार्यसम्पादनको समीक्षा, भ्रातृ संस्था तथा शुभेच्छुक संगठनहरूको व्यवस्थापन, र केन्द्रीय लेखा समिति गठनसम्बन्धी विषयहरू पनि एजेन्डामा समावेश गरिएको छ।
आजको बैठकमा २८ जना केन्द्रीय सदस्यहरूले आ-आफ्ना धारणा राखेका छन्। धारणा राख्ने क्रम जारी रहेकाले बैठक चैत ११ गते बिहान ११ बजे पुनः बस्ने नेपाली कांग्रेसका का.बा.मुख्यसचिव कृष्ण प्रसाद दुलालद्वारा जारी जनाइएको छ ।
बैठकमा डा. गोपाल दहित, तारामान गुरुङ, मैकुलाल वाल्मिकी, अजयबाबु शिवाकोटी, भरतकुमार शाहलगायतका नेताहरूले समसामयिक राजनीतिक अवस्था, पार्टी सुदृढीकरण र आगामी रणनीतिबारे आफ्नो धारणा राखेका थिए।
नेपाली कांग्रेसले आन्तरिक सुधार र संगठन सुदृढीकरणलाई प्राथमिकतामा राख्दै आगामी दिनमा ठोस निर्णय लिने संकेत गरेको छ।
