काठमाडौं । नेपाली कांग्रेसभित्र नेतृत्व शैली र एकताको विषय फेरि बहसमा आएको छ।
कांग्रेसका नेता गोविन्दराज पोखरेलले पार्टीको इतिहास स्मरण गराउँदै “अकेला चलो” रणनीतिबाट कहिल्यै दीर्घकालीन सफलता हासिल हुन नसकेको टिप्पणी गरेका छन्।
सामाजिक सञ्जालमार्फत आफ्नो धारणा सार्वजनिक गर्दै पोखरेलले २१औँ शताब्दीमा प्रविधि, एल्गोरिदम र युवाको आवेगले राजनीतिक प्रवृत्तिमा परिवर्तन ल्याउन सक्ने सम्भावना औंल्याए पनि कांग्रेसको ऐतिहासिक अनुभवले एकल नेतृत्वभन्दा सामूहिक निर्णयलाई नै प्रभावकारी देखाएको उल्लेख गरेका छन्।
उनले बीपी कोइरालाले असहमतिका बाबजुद अघि बढाएको सशस्त्र क्रान्ति अपेक्षित सफलता हासिल गर्न नसकेको, २०५१ सालमा गिरिजाप्रसाद कोइरालाले गरेको मध्यावधि निर्वाचनले देशलाई अस्थिरतामा धकेलेको तथा शेरबहादुर देउवाले पार्टी फुटाएर अघि बढाएको प्रयास पनि टिक्न नसकेको उदाहरण प्रस्तुत गरेका छन्।
त्यस्तै, “म नै बलियो” भन्ने सोचले पार्टीलाई एकताबद्ध गर्न नसक्दा कांग्रेसले अपेक्षित उपलब्धि हासिल गर्न नसकेको उनको भनाइ छ। पोखरेलका अनुसार नेपाली कांग्रेसमा जो नेतृत्वमा रहे पनि संवाद, सहमति र सहकार्य नै सफलताको आधार हुन्।
“लोकतान्त्रिक तथा राष्ट्रवादी शक्तिलाई सशक्त बनाउने हो भने यही मार्ग सबैभन्दा उपयुक्त हो,” उनले भनेका छन्। उनको अभिव्यक्तिले कांग्रेसभित्र आन्तरिक एकता, नेतृत्व शैली र भावी रणनीतिबारे पुनः बहसलाई तातेको छ।
