काठमाडौं । बालश्रम र बालअधिकार उल्लंघनको आरोपमा लुम्बिनी प्रदेशसभा सदस्य तथा नेकपा (एमाले)बाट निर्वाचित रेखा शर्मा पक्राउ परेकी छन्।
उनलाई आइतबार मध्यराति काठमाडौंको धुम्बराहीस्थित निवासबाट उपत्यका अपराध अनुसन्धान कार्यालयको टोलीले नियन्त्रणमा लिएको हो।
प्रहरीका अनुसार शर्मामाथि एक नाबालिकालाई घरेलु कामदारका रूपमा राखी बालबालिकाविरुद्धको कसुर गरेको आरोप लागेको छ। यस प्रकरणमा यसअघि नै काठमाडौं महानगरपालिकाले उनको घरबाट एक बालिकाको उद्धार गरेको थियो।
तत्कालीन काठमाडौं महानगरपालिकाका मेयर बालेन्द्र शाहले २०८१ माघ २९ गते सामाजिक सञ्जालमार्फत उक्त घटनाबारे प्रतिक्रिया दिँदै पीडित बालिकालाई ‘नआत्तिनू, समय आउनेछ’ भन्दै हौसला दिएका थिए।
साथै उनले बालबालिकामाथि हुने विभेद र अपराध अन्त्यका लागि शिक्षा र सामाजिक चेतनाको खाँचो औंल्याएका थिए। प्रधानमन्त्रीमा बालेन्द्र शाह नियुक्त भएसँगै उक्त प्रकरण पुनः सक्रिय बनेको र त्यसकै क्रममा शर्मालाई पक्राउ गरिएको स्रोतले जनाएको छ।
यद्यपि, उनलाई पक्राउ पुर्जीबिना नै मध्यरातमा नियन्त्रणमा लिइएको दाबी पनि सार्वजनिक भएको छ। घटनाबारे थप अनुसन्धान भइरहेको प्रहरीले जनाएको छ भने कानुनी प्रक्रिया र मानवअधिकारको पालना विषयमा समेत चासो व्यक्त हुन थालेको छ।
