काठमाडौं - गृहमन्त्री सुधन गुरूङले नेपाल प्रहरीलाई निष्पक्ष र निर्धक्क रूपमा काम गर्न निर्देशन दिँदै प्रहरीमाथि कुनै पनि तहबाट हस्तक्षेप नहुने स्पष्ट पारेका छन्।
सोमबार नेपाल प्रहरी प्रधान कार्यालयको निरीक्षण भ्रमणका क्रममा उनले यस्तो सन्देश दिएका हुन्। प्रधान कार्यालयमा आयोजित कार्यक्रममा सम्बोधन गर्दै गृहमन्त्री गुरूङले सीमित स्रोतसाधनका बाबजुद नेपाल प्रहरीले जिम्मेवारी प्रभावकारी रूपमा निर्वाह गर्दै आएको प्रशंसा गरे।
उनले आगामी दिनमा अझ व्यावसायिक, परिणाममुखी र जनउत्तरदायी ढंगले काम गर्न आग्रह गर्दै प्रहरीको मनोबल उच्च राख्न निर्देशन दिए। उनले नागरिक–प्रहरी सम्बन्ध सुधारलाई विशेष प्राथमिकतामा राख्दै शिष्ट व्यवहार, सेवा प्रवाहमा संवेदनशीलता र जनतासँगको दूरी घटाउने उपाय अवलम्बन गर्न जोड दिए।
“प्रहरी सेवा नागरिकका लागि हो, त्यसैले उपलब्ध साधनस्रोतको अधिकतम उपयोग गर्दै उत्कृष्ट सेवा दिनुपर्छ,” उनले भने। गृहमन्त्री गुरूङले प्रविधिमैत्री प्रहरी निर्माण, डिजिटल फरेन्सिक, एआई तथा डेटा विश्लेषण जस्ता आधुनिक प्रणालीको प्रयोगलाई विस्तार गर्ने प्रतिबद्धता जनाए।
साथै विपद् व्यवस्थापनमा प्रहरीको अग्रणी भूमिका सुदृढ गर्न आवश्यक तालिम र स्रोतसाधन थप गरिने बताए। कार्यक्रममा गृहसचिव राजकुमार श्रेष्ठले प्रतिनिधि सभा निर्वाचनलाई शान्तिपूर्ण रूपमा सम्पन्न गराउन नेपाल प्रहरीले खेलेको भूमिकाको उच्च प्रशंसा गर्दै आगामी दिनमा अझ छिटो, प्रभावकारी र फरक शैलीमा सेवा दिन निर्देशन दिए।
प्रहरी महानिरीक्षक दानबहादुर कार्कीले संगठन संविधान र कानुनको परिधिभित्र रही मानवअधिकारको सम्मान गर्दै काम गरिरहेको उल्लेख गर्दै गृहमन्त्रीबाट प्राप्त निर्देशनले प्रहरी संगठनको मनोबल थप उकासिने विश्वास व्यक्त गरे।
निरीक्षणका क्रममा गृहमन्त्री गुरूङले अमर प्रहरी स्मारकमा श्रद्धाञ्जली अर्पण गर्नुका साथै डिजिटल फरेन्सिक ल्याब, एआई सेल, डाटा सेन्टर लगायत विभिन्न इकाइहरूको अवलोकन गरेका थिए।
