काठमाडौं । नेपाली कांग्रेसको केन्द्रीय अनुशासन समितिले गत फागुन २१ गते सम्पन्न प्रतिनिधिसभा निर्वाचनमा पार्टीका उम्मेदवारविरुद्ध अन्तर्घात गर्ने ५०७ जना नेता तथा कार्यकर्तालाई स्पष्टीकरण सोध्ने निर्णय गरेको छ।
समितिका संयोजक तारामान गुरुङको अध्यक्षतामा बुधबार पार्टी कार्यालयमा बसेको बैठकले अनुशासन उल्लंघन गर्नेहरूमाथि छानबिन अघि बढाउँदै सफाइ पेस गर्न निर्देशन दिएको हो।
बैठकपछि समितिका सचिव दिनेश थापा मगरद्वारा जारी विज्ञप्तिमा निर्वाचनका क्रममा अनुशासन उल्लंघन गरेको भन्दै विभिन्न जिल्ला र उम्मेदवारहरूबाट हालसम्म ५०७ जनाविरुद्ध उजुरी परेको छ। प्राप्त उजुरीहरूलाई समितिले पाँच फरक प्रकृतिका कसुरमा वर्गीकरण गर्दै अविलम्ब टुंगोमा पुर्याउने निर्णय गरेको उनले बताए ।
जसमा स्वतन्त्र (बागी) उम्मेदवार बनेका र तिनका प्रस्तावक तथा समर्थक बसेका, पार्टी उम्मेदवारविरुद्ध प्रत्यक्ष रूपमा प्रचारप्रसारमा खटिएका र अप्रत्यक्ष रूपमा विपक्षीलाई सहयोग पुर्याएकाहरूलाई कारबाहीको दायरामा ल्याइनेछ।
यसैगरी, चुनावमा पार्टीको पक्षमा भोट नमागी ‘साइलेन्स किलिङ’ गर्ने र कांग्रेसबाटै निर्वाचित जनप्रतिनिधि भएर पनि प्रतिनिधिसभा निर्वाचनमा विपक्षीलाई सहयोग गर्नेहरूमाथि पनि समितिले छानबिन थालेको छ।
यसरी वर्गीकरण गरिएका आरोप लागेका व्यक्तिहरूलाई ७ दिनभित्र आफ्नो स्पष्टीकरण पेस गर्न समितिले निर्देशन दिएको उनको भनाइ छ ।
यसैगरी, बैठकले पार्टीको नक्कली लेटरप्याड प्रयोग गरी भ्रम फैलाउनेलाई पनि कारबाहीको चेतावनी समेत दिएको छ। गत चैत १४ गते कसैले आफूसँग हुँदै नभएको जिम्मेवारी उल्लेख गरी नक्कली लेटरप्याडमार्फत अनधिकृत वक्तव्य जारी गरेको प्रति गम्भीर ध्यानाकर्षण भएको जनाउँदै समितिले त्यस्तो कार्य गर्नेलाई सचेत गराएको छ।
आगामी दिनमा यस्तो गलत गतिविधि गर्ने जोकोहीलाई पनि पार्टी विधान र प्रचलित कानुनबमोजिम कारबाही प्रक्रिया अघि बढाउने चेतावनी कांग्रेसले दिएको छ।
साथै, निर्वाचनका क्रममा भएका अनुशासन उल्लंघनका घटनामा उजुरी दिन बाँकी रहेको भए चैत मसान्तभित्र केन्द्रीय अनुशासन समितिमा पठाइसक्न निर्देशन दिइएको छ।
