काठमाडौं l नेपाली कांग्रेसले १५औं महाधिवेशनको तयारीलाई औपचारिक रूपमा अघि बढाएको छ।

यसअन्तर्गत पार्टीले ७७ वटै जिल्लामा खटिने केन्द्रीय प्रतिनिधिहरूसँग सानेपास्थित केन्द्रीय कार्यालयमा अन्तरसंवाद तथा अभिमुखीकरण कार्यक्रम सम्पन्न गरेको छ।

कार्यक्रममा महामन्त्री प्रदीप पौडेलले प्रतिनिधिहरूलाई जिल्लामा गएर निर्वाह गर्नुपर्ने जिम्मेवारी, सदस्यता वितरण, अद्यावधिक तथा संगठन विस्तारका कार्यहरूबारे स्पष्ट मार्गदर्शन दिएका छन्।

उनका अनुसार वैशाख महिनाभर देशभर सदस्यता वितरण र अद्यावधिक अभियान सञ्चालन गरिनेछ, जसले पार्टीको संगठनात्मक आधारलाई अझ मजबुत बनाउने अपेक्षा गरिएको छ।

कांग्रेसले १ वैशाखदेखि मसान्तसम्म वडास्तरबाट क्रियाशील सदस्यता वितरण तथा अद्यावधिक गर्ने कार्यतालिका तय गरेको छ। उक्त अभियानपछि १५ जेठसम्म वडाबाट क्षेत्र र जिल्लामा सदस्यता पठाइने तथा २५ जेठसम्म सबै विवरण केन्द्रमा प्रविष्ट गरिसक्ने योजना रहेको छ।

सहमहामन्त्री डा. डिला संग्रौलाले यस प्रशिक्षण कार्यक्रमले कार्यकर्ताको मनोबल उच्च बनाउने विश्वास व्यक्त गरेकी छन्। महाधिवेशन केन्द्रित यस अभियानमा महामन्त्री प्रदीप पौडेलको सक्रिय भूमिका र स्पष्ट नेतृत्वले पार्टीभित्र नयाँ ऊर्जा थपिएको भन्दै उनको समर्थनमा आवाजसमेत बढ्दै गएको छ।