अर्घाखाँची l अर्घाखाँची जिल्ला अस्पतालमा रेबिज विरुद्धको खोप तथा डढेको घाउमा प्रयोग हुने अत्यावश्यक औषधिको अभाव भएपछि बिरामीहरू गम्भीर समस्यामा परेका छन्।
दैनिक उपचारका लागि आउने सेवाग्राहीहरू आवश्यक औषधि नपाउँदा निजी मेडिकलबाट महँगो मूल्यमा किन्न बाध्य भएका छन्। विशेषगरी कुकुर तथा अन्य जनावरको टोकाइपछि तुरुन्त लगाउनुपर्ने रेबिज खोप अस्पतालमै नपाउँदा बिरामीहरू निजी स्वास्थ्य संस्थान वा अन्य जिल्लाका अस्पताल धाउनुपर्ने अवस्था सिर्जना भएको छ।
यसले समयमै उपचार नपाउने जोखिम बढाउनुका साथै बिरामीमाथि थप आर्थिक भार पनि परेको स्थानीय ज्ञान प्रसाद उपाध्यायले गुनासो गर्नुभयो। अस्पतालमा दैनिक रूपमा छाडा कुकुरको टोकाइबाट पीडित १० देखि १५ जनासम्म बिरामी आउने गरेका छन्।
यस्तै, आगो वा तताएको वस्तुबाट पोलिएका बिरामीका लागि आवश्यक मलहमको पनि अभाव रहेको छ, जसले प्राथमिक उपचारमै समस्या उत्पन्न गरिरहेको छ। अस्पताल प्रशासनका अनुसार आपूर्ति प्रक्रियामा ढिलाइ हुनु र प्रदेश स्तरबाट औषधि खरिद नगर्नु मुख्य कारणका रूपमा देखिएको छ।
सम्बन्धित निकायसँग पटक–पटक माग गरिए पनि समयमै औषधि उपलब्ध हुन नसकेको अस्पतालका सूचना अधिकारी निम रानाले जानकारी दिनुभयो।
स्थानीय बासिन्दाले स्वास्थ्यजस्तो संवेदनशील क्षेत्रमा देखिएको यस्तो लापरबाही अस्वीकार्य भएको भन्दै तत्काल आवश्यक औषधि उपलब्ध गराउन सरकारसँग माग गरेका छन्।
बिरामीको ज्यानसँग प्रत्यक्ष जोडिएको विषय भएकाले सम्बन्धित निकायले शीघ्र समाधान खोज्नुपर्ने देखिएको छ।
