कपिलवस्तु l कपिलवस्तुको महाराजगञ्ज नगरपालिका–६ बर्गदामा भएको हिंसात्मक घटनामा प्रहरीको गोली लागेर घाइते भएका २२ वर्षीय अरुण यादवको उपचारका क्रममा मृत्यु भएको छ।
उनको सोमबार बिहान करिब ४ बजे चितवन मेडिकल कलेजमा निधन भएको प्रहरीले जनाएको छ। प्रहरी नायब उपरीक्षक रिपेन्द्र कुमार सिंहका अनुसार गत चैत ७ गते दुई समुदायबीच भएको झडपका क्रममा स्थिति नियन्त्रणमा लिन प्रहरीले चलाएको गोली लागेर यादव गम्भीर घाइते भएका थिए।
उनको आन्द्रामा गहिरो चोट लागेको थियो र शल्यक्रिया समेत गरिएको थियो। उक्त घटनामा यादवसहित पाँच जना गोली लागेर घाइते भएका थिए। अन्य चार जना भने भैरहवा मेडिकल कलेजमा उपचारपछि घर फर्किसकेका छन्।
चैत ७ गते ईदका दिन बर्गदा गाउँमा नमाज पढ्ने क्रममा नजिकैको काली मन्दिरमा चर्को स्वरमा भजन बजाइएको विषयलाई लिएर मुस्लिम र हिन्दु समुदायबीच विवाद उत्पन्न भई हिंसात्मक रूप लिएको थियो।
स्थिति नियन्त्रण गर्न प्रहरीद्वारा लाठीचार्ज, दर्जनौँ राउन्ड अश्रुग्यास प्रहार तथा हवाई फायरसमेत गरिएको थियो। घटनापछि मन्दिर तोडफोडको आरोपमा ६ जना र सामाजिक सञ्जालमार्फत भ्रम फैलाएको आरोपमा थप ४ जनालाई पक्राउ गरी मुद्दा चलाइएको प्रहरीले जनाएको छ।
