अर्घाखाँची l अर्घाखाँचीको सदरमुकाम सन्धिखर्कस्थित बसपार्कमै हाटबजार सञ्चालन हुँदा यातायात व्यवस्थापन अस्तव्यस्त बनेको छ भने यात्रु र सवारी चालक दुवैको सुरक्षामा गम्भीर खतरा उत्पन्न भएको छ।

हरेक शुक्रबार लाग्ने हाटबजारका कारण बसपार्क भित्रिने र बाहिरिने सडकखण्डमै व्यापारिक गतिविधि बढ्ने गरेको छ। व्यापारीहरूले सडक किनारमै पसल राख्दा सडक साँघुरो बन्नुका साथै आवागमनमा अवरोध सिर्जना भइरहेको स्थानीयले बताएका छन्।

स्थानीय माया पौडेलका अनुसार बजारको भीडका कारण कतिपय समयमा सवारीसाधन चल्नै नसक्ने अवस्था आउने गरेको छ। “बसपार्कमै हाटबजार लाग्दा यात्रु र सवारी दुवै जोखिममा पर्ने गरेका छन्,” उहाँले भन्नुभयो।

हाटबजारमा व्यवसाय गर्दै आएका जीवन आचार्यले बसपार्क क्षेत्रमै खुला रूपमा बजार सञ्चालन हुँदा हावा, हुरी, वर्षा र घामको प्रत्यक्ष असर पर्ने गरेको गुनासो गर्नुभयो। “सवारी र मानिसको अत्यधिक चापका कारण व्यापार गर्न पनि समस्या छ, दुर्घटनाको जोखिम पनि उत्तिकै छ,” उहाँले भन्नुभयो।

व्यवसायीहरूका अनुसार स्थानीय उत्पादनको बजारीकरणमा हाटबजारले सहयोग गरे पनि व्यवस्थित स्थानको अभावले समस्या झनै बढाएको छ।

बसपार्क क्षेत्रमा सवारी र मानिसको अत्यधिक भीड हुने भएकाले दुर्घटनाको सम्भावना उच्च रहेको उनीहरूको भनाइ छ। स्थानीय शुक्ला आचार्यले सन्धिखर्क नगरपालिका र ट्राफिक प्रहरी कार्यालयले तत्काल पहल गरी हाटबजारलाई व्यवस्थित स्थानमा सार्नुपर्ने माग गर्नुभयो।

लामो समयदेखि सदरमुकाममै अव्यवस्थित रूपमा सञ्चालन हुँदै आएको हाटबजारप्रति नगरपालिका तथा सम्बन्धित निकाय बेखबर देखिँदा स्थानीयवासी चिन्तित बनेका छन्।