काठमाडौं l नेपाल कम्युनिस्ट पार्टीका संयोजक पुष्पकमल दाहाल ‘प्रचण्ड’ले संविधानमाथि कुनै पनि प्रकारको हस्तक्षेप वा छेडखानी हुन थाले सशक्त प्रतिवादमा उत्रिने चेतावनी दिएका छन्।

पार्टी मुख्यालय पेरिसडाँडामा आयोजित कार्यक्रममा बोल्दै उनले संविधानको मर्म, जनताको अधिकार र राष्ट्रिय हितको रक्षा आफ्नो पहिलो प्राथमिकता भएको स्पष्ट पारे।

संविधानभित्र रहेर सरकारले गर्ने सकारात्मक काममा भने आफ्नो पार्टी रचनात्मक ढंगले सहयोगी बन्ने उनको भनाइ थियो। “यदि वर्तमान सरकारले संविधानको दायराभित्र रहेर जनताको हितमा काम गर्छ भने हामी त्यसलाई समर्थन गर्छौं,” प्रचण्डले भने, “तर संविधानमाथि छेडखानी भयो, राष्ट्रिय हितमा आँच आयो वा जनअधिकार खोसिने गतिविधि भए भने हामी सदन र सडक दुवैबाट कडा प्रतिवाद गर्छौं।”

उनले लोकतन्त्रको मूल आधार संविधान भएकाले यसको संरक्षण सबै राजनीतिक शक्तिको साझा जिम्मेवारी भएको उल्लेख गरे। साथै, जनताले प्राप्त गरेका उपलब्धिहरूलाई कमजोर पार्ने कुनै पनि प्रयास स्वीकार्य नहुने स्पष्ट पारे।

प्रचण्डको यो अभिव्यक्तिलाई वर्तमान राजनीतिक परिदृश्यमा संविधान र लोकतान्त्रिक मूल्यप्रति चासो र सतर्कताको सन्देशका रूपमा हेरिएको छ।