अर्घाखाँची l लुम्बिनी प्रदेशको अर्थ, उद्योग तथा पर्यटन समितिले अर्घाखाँचीस्थित घरेलु तथा साना उद्योग कार्यालयको अनुगमन गर्दै सेवा प्रवाह, योजना कार्यान्वयन र उद्योग प्रवर्द्धनका अवस्थाबारे गम्भीर समीक्षा गरेको छ।

प्रदेश सभा सदस्य तथा समितिका संयोजक राजुप्रसाद श्रेष्ठको नेतृत्वमा पुगेको टोलीले सन्धिखर्कमा आयोजित अन्तरक्रिया कार्यक्रममा कार्यालयका गतिविधि, बजेट कार्यान्वयन, योजना प्रभावकारिता तथा देखिएका चुनौतीहरूबारे विस्तृत जानकारी लिएको थियो।

कार्यालय प्रमुख दुर्गा न्यौपानेले आर्थिक वर्ष २०८२/८३ का योजनाहरूको प्रगति प्रस्तुत गर्दै बजेट कटौती, जनशक्ति अभाव, सवारी साधनको कमी तथा कार्यान्वयनका क्रममा देखिएका समस्याहरू औंल्याउनुभयो।

साथै, उद्यमशीलता विकास, सीपमूलक तालिम, उद्योग दर्ता र प्रवर्द्धनका क्षेत्रमा भएका कामहरूको विवरण पनि प्रस्तुत गरिएको थियो। कार्यक्रममा स्थानीय स्तरमा घरेलु उद्योग प्रवर्द्धनमा स्रोत-साधन अभाव, बजार पहुँचको कठिनाइ तथा उद्योगमैत्री वातावरण अभाव जस्ता समस्याहरू प्रमुख रूपमा उठाइएका थिए।

संयोजक श्रेष्ठले स्थानीय उद्यम सुदृढीकरणमा प्रदेश सरकार प्रतिबद्ध रहेको उल्लेख गर्दै परिणाममुखी कार्यक्रम सञ्चालनमा जोड दिनुभयो। उहाँले तालिमको प्रभाव, रोजगारी सिर्जना र योजनाको वास्तविक उपलब्धिबारे विस्तृत प्रतिवेदन समितिमा पठाउन निर्देशन दिनुभयो।

प्रदेश सभा सदस्य तुलसीप्रसाद चौधरीले दर्ता भएका उद्योगहरू बन्द हुने क्रम बढ्नुका कारण खोज्नुपर्ने आवश्यकता औंल्याउनुभयो भने सदस्य हेमा बेलबासे केसीले तालिममा दोहोरिने सहभागीको गुनासो समाधान गर्न र परिणाम देखिने गरी काम गर्न सुझाव दिनुभयो।

अनुगमन टोलीमा प्रदेश सभा सदस्यहरू भगवती कुमारी थरुनी, रेवती गुरुङ, तुलसी शर्मा, समितिकी सचिव कमला पौडेल पोखरेल तथा सञ्चारकर्मीहरूको सहभागिता रहेको थियो।

समितिले सन्धिखर्कस्थित सेरामिक्स उद्योग र सहुलियत ऋणमार्फत सञ्चालनमा रहेको गार्मेन्ट उद्योगको समेत स्थलगत अनुगमन गरेको जनाएको छ।