काठमाडौं l नेपाली कांग्रेसभित्र एकता सुदृढ गर्ने उद्देश्यले युवा नेताहरूले महत्वपूर्ण पहल थालेका छन्।
आइतबार अनामनगरस्थित जय नेपाल फाउण्डेसनको कार्यालयमा सम्पन्न भेलाले पार्टीभित्र देखिएको ध्रुवीकरण अन्त्य गर्न देशव्यापी दबाबमूलक अभियान सञ्चालन गर्ने निर्णय गरेको छ।
युवाहरूले संस्थापन र इतर समूहबीच बढ्दो विभाजनलाई रोक्न सचेतनामूलक कार्यक्रमहरू अघि बढाउने र नेतृत्वलाई एकताको पक्षमा उभिन दबाब दिने रणनीति बनाएका छन्।
केही दिनभित्रै सार्वजनिक हुने कार्यतालिकाले आगामी १५औँ महाधिवेशनलाई एकताबद्ध, सशक्त र परिणाममुखी बनाउने लक्ष्य लिएको छ।
भेलामा प्रतिमा गौतम, उमेशजंग रायमाझी, पुष्प पराजुली, बिनोद कायस्थ, नयनसिंह महर, बद्री अर्याल, निर्मला क्षेत्री, मनोजमणि आचार्य, बालचन्द्र पौडेल, सरोज थापा, पुष्प शाही, अन्जन लामा, विष्णु पन्थी, लेखनाथ पोख्रेल, ध्रुव पाण्डे, सन्तोष भट्टराई र सुदन वलीलगायत युवा नेताहरूको उपस्थिति रहेको थियो।
यसै क्रममा सभापति गगन थापाले पोखरामा आयोजित सभालाई सम्बोधन गर्दै आफ्नो कार्यकालमा पार्टीलाई सबैको अपनत्व हुने गरी एकताबद्ध बनाउने प्रतिबद्धता पुनः दोहोर्याए।
युवाहरूले महाधिवेशनअघि नै कांग्रेसलाई अन्य दलभन्दा सक्षम, संगठित र प्रभावशाली बनाउने लक्ष्यसहित थप सक्रिय हुने बताएका छन्।
यो अभियानले नेपाली कांग्रेसको भविष्यलाई नयाँ पुस्ताको नेतृत्वमा उज्यालो दिशातर्फ लैजाने विश्वास लिइएको छ।
