कपिलवस्तु- कपिलवस्तु जिल्लाको कपिलवस्तु नगरपालिका–स्थित चोकबजारबाट स्रोत नखुलेको १४ लाख भारतीय रुपैयाँसहित एक युवकलाई प्रहरीले पक्राउ गरेको छ।
सोमबार दिउँसो विशेष सूचनाका आधारमा गरिएको कारबाहीमा मायादेवी गाउँपालिका-८ बरकुल निवासी २१ वर्षीय अभिषेक गुप्तालाई नियन्त्रणमा लिइएको हो।
जिल्ला प्रहरी कार्यालयका अनुसार गुप्ता सवार लु १८ प ८७४७ नम्बरको मोटरसाइकललाई चोकबजारस्थित राजेश पान पसल नजिकैबाट पछ्याइएको थियो।
प्रहरी देखेपछि मोटरसाइकल छाडेर भाग्ने प्रयास गरेका गुप्तालाई महेन्द्रगेट नजिकैबाट पक्राउ गरिएको हो। प्रहरी नायब उपरीक्षक रिपेन्द्र कुमार सिंहका अनुसार मोटरसाइकलको सिटमुनि र डिक्कीमा लुकाएर राखिएको अवस्थामा ५ सय दरका २८ गड्डी भारतीय रुपैयाँ बरामद गरिएको छ, जसको कुल मूल्य १४ लाख हुन्छ।
पक्राउ परेका गुप्ता बर्रोहिया क्षेत्रमा सञ्चालित ‘न्यु गुप्ता पेट्रोल पम्प’का सञ्चालक रहेको खुलेको छ। यसअघि पनि जिल्लामा बरामद भएका अवैध मुद्रा तथा सुनका घटनामा उनको नाम जोडिँदै आएको प्रहरीले जनाएको छ।
गुप्तामाथि थप अनुसन्धान तथा कानुनी कारबाहीका लागि राजस्व अनुसन्धान कार्यालय, बुटवल पठाउने तयारी भइरहेको प्रहरीले जानकारी दिएको छ।
