कपिलवस्तु l कपिलवस्तु जिल्लाको शिवराज नगरपालिका-६ गडगौडाबाट प्रहरीले साढे दुई क्विन्टलभन्दा बढी अवैध माछा बरामद गरेको छ।
भारतबाट सीमा क्षेत्र हुँदै चोरी पैठारी गरी ल्याइँदै गरेको बैखी जातका माछा प्रहरीले नियन्त्रणमा लिएको हो। प्रहरीका अनुसार भारतीय नम्बर प्लेट भएका दुई मोटरसाइकलमा माछा ल्याइँदै गर्दा प्रहरी टोलीलाई देखेपछि चालकहरू माछा छाडेर फरार भएका थिए।
फरार व्यक्तिहरूको खोजी कार्य तीव्र पारिएको वडा प्रहरी कार्यालय चन्द्रौटाले जनाएको छ। वडा प्रहरी कार्यालय चन्द्रौटाका प्रहरी निरीक्षक सन्तोष घिमिरेका अनुसार बरामद माछाको अनुमानित मूल्य करिब ८८ हजार रुपैयाँ रहेको छ।
अवैध रूपमा ल्याइएका माछा स्वास्थ्य र कानुनी दृष्टिले जोखिमपूर्ण हुने भएकाले ती माछा खाल्टोमा पुरेर नष्ट गरिएको प्रहरीले जानकारी दिएको छ। प्रहरीले सीमा क्षेत्रमा अवैध आयात-निर्यात नियन्त्रणका लागि निगरानी कडा पारिएको जनाएको छ।
