काठमाडौं । नेपाली कांग्रेसका सभापति गगनकुमार थापाले पार्टीभित्र वृहत्तर एकता कायम गर्ने अभियानलाई तीव्रता दिएका छन्।
सोही क्रममा उनले आइतबार साँझ निवर्तमान कार्यवाहक सभापति पूर्णबहादुर खड्कासँग भेटवार्ता गर्दै संगठनभित्रको समन्वय र सहकार्यलाई मजबुत बनाउने प्रयास गरेका छन् ।
थापा खड्कालाई भेट्न गोल्फुटारस्थित निवास पुगेका थिए । भेटपछि सभापति थापाले पार्टीभित्र देखिएका असमझदारी अन्त्य गर्दै साझा लक्ष्यतर्फ अघि बढ्न आफूले वरिष्ठ नेताहरूसँग निरन्तर संवाद गरिरहेको बताए ।
“पार्टीलाई एकताबद्ध बनाउँदै सशक्त बनाउनु अहिलेको आवश्यकता हो,” उनले उल्लेख गरे । उनका अनुसार वर्तमान राजनीतिक परिस्थिति र सर्वोच्च अदालतको निर्णयले कांग्रेसलाई थप मजबुत र एकजुट बनाउने अवसर प्रदान गरेको छ ।
थापाले संगठन सुदृढीकरण, नेतृत्वबीच सहकार्य र कार्यकर्तामा उत्साह जगाउने दिशामा आफ्नो ध्यान केन्द्रित रहेको स्पष्ट पारे । त्यसैगरी, उनले पन्ध्रौँ महाधिवेशनलाई पार्टी रूपान्तरणको ऐतिहासिक अवसरका रूपमा उपयोग गर्न सबै नेता तथा कार्यकर्तालाई एकताबद्ध भएर अघि बढ्न आह्वान गरेका छन् ।
