काठमाडौँ । नेपाली काँग्रेसले संविधान संशोधनका लागि औपचारिक रूपमा गृहकार्य सुरु गरेको छ।
सुझाव संकलन र मस्यौदा तयारीका लागि गठित १७ सदस्यीय समितिको पहिलो बैठक आज बसेसँगै प्रक्रिया अघि बढाइएको हो। पार्टी उपसभापति पुष्पा भुसालको संयोजकत्वमा रहेको उक्त समितिको बैठकमा सभापति गगनकुमार थापा, महामन्त्री प्रदीप पौडेल तथा सहमहामन्त्रीद्वय उदयशमशेर राणा र योगेन्द्र चौधरीको उपस्थिति रहेको थियो।
बैठकमा सभापति थापाले संविधान संशोधनको आवश्यकता र समितिको जिम्मेवारीबारे स्पष्ट पारेका थिए। उनका अनुसार संविधान जारी भएको एक दशकभन्दा बढी भइसकेको सन्दर्भमा अभ्यासका क्रममा केही प्रावधानहरू संशोधन गर्नुपर्ने आवश्यकता देखिएको छ।
उनले लोकतन्त्र, नागरिक अधिकार, राष्ट्रियता र समुन्नतिलाई केन्द्रमा राखेर व्यापक छलफल अगाडि बढाउन सुझाव दिएका छन्। समितिका सदस्य सचिव राजु कटुवालका अनुसार प्रारम्भमा संविधानको सूक्ष्म अध्ययन गरी संशोधनका सम्भावित बुँदाहरूको मस्यौदा तयार गरिनेछ।
त्यसपछि सरोकारवाला निकाय, विज्ञ तथा आम नागरिकसँग व्यापक परामर्श गरिने योजना रहेको छ। यसैबीच, सरकारले पनि संविधान संशोधनका लागि छुट्टै समिति गठन गरी काँग्रेससँग प्रतिनिधित्वका लागि आग्रह गरिरहेको छ। तर, काँग्रेसले सो समितिमा प्रतिनिधि पठाउने विषयमा हालसम्म कुनै निर्णय नगरेको कटुवालले जानकारी दिएका छन्।
सरकारले शुक्रबारसम्म नाम पठाउन आग्रह गरेको छ भने काँग्रेसको आन्तरिक समितिको अर्को बैठक आगामी बिहीबार बस्ने तय भएको छ।
काँग्रेसले गठन गरेको समितिमा वरिष्ठ अधिवक्ता तथा संविधानविद्हरू राधेश्याम अधिकारी, हरिहर दाहाल, प्रेमबहादुर खड्का, उपेन्द्र केशरी न्यौपाने, शेरबहादुर केसी, यदुनाथ खनाल, गोपालकृष्ण घिमिरे, योगेन्द्रबहादुर अधिकारी, दिनेश त्रिपाठी, सिताराम केसी, ललितबहादुर बस्नेत तथा अधिवक्ताहरू रनबहादुर थेवे, सर्मिला श्रेष्ठ, झलमाया विक र निरज गुप्ता सदस्यका रूपमा रहेका छन्।
