काठमाडौं । प्रधानमन्त्री बालेन्द्र शाहले काठमाडौँ उपत्यकाका नदीकिनारमा बसोबास गर्दै आएका जोखिमपूर्ण बस्तीहरूलाई सुरक्षित स्थानमा स्थानान्तरण गर्ने तयारी भइरहेको बताएका छन् ।
उनले सामाजिक सञ्जालमार्फत् आफ्नो धारणा सार्वजनिक गर्दै हरेक वर्ष दोहोरिने बाढी र डुबानका कारण हजारौँ नागरिकले भोग्दै आएको पीडालाई अब अन्त्य गर्नुपर्नेमा जोड दिएका छन् ।
प्रधानमन्त्री शाहले वर्षेनी बाढीका कारण नदीकिनारका बासिन्दाहरूले ज्यान जोगाउँदै घरबार छाडेर भाग्नुपर्ने अवस्था सिर्जना हुनु गम्भीर मानवीय समस्या भएको उल्लेख गरेका छन् । “अब पनि ठूलो दुर्घटना पर्खेर बस्ने कि सुरक्षित व्यवस्थापन गर्ने?” भन्ने प्रश्न उठाउँदै उनले जोखिममा रहेका नागरिकको जीवनसँग राजनीति गर्न नहुने स्पष्ट पारे ।
उनका अनुसार नदीकिनारका अव्यवस्थित बस्तीका कारण ढल निकास प्रणाली प्रभावित भई उपत्यका प्रदूषित बन्दै गएको छ । यस समस्याको समाधानका लागि थापाथली, गैरीगाउँ, मनोहरा लगायत क्षेत्रका बस्तीहरूलाई मानवीय ढंगले, बल प्रयोग नगरी सुरक्षित स्थानमा सारिनेछ ।
प्रधानमन्त्रीले आफूले उम्मेदवार हुँदा गरेका प्रतिबद्धता, पार्टीको वाचापत्र तथा सरकारका ‘१०० दिनका प्राथमिकता’ अन्तर्गत सुकुम्बासी व्यवस्थापन र सार्वजनिक जग्गा अतिक्रमण नियन्त्रणलाई प्राथमिकतामा राखिएको बताएका छन् ।
“अतिक्रमणकारी र वास्तविक सुकुम्बासी छुट्याएर देशभरका वास्तविक पीडितलाई जग्गा उपलब्ध गराइनेछ,” उनले भने । देशभर रहेका लाखौँ सुकुम्बासीको दीर्घकालीन समाधान गर्ने प्रतिबद्धता दोहोर्याउँदै प्रधानमन्त्री शाहले यसपटक समस्या स्थायी रूपमा समाधान गर्ने दाबी गरेका छन् ।
