काठमाण्डाै – नेपाली कांग्रेस सदस्यता व्यवस्थापन केन्द्रीय समितिको बैठक महामन्त्री एवं समितिका संयोजक प्रदीप पौडेलको अध्यक्षतामा ललितपुरस्थित केन्द्रीय कार्यालय वीपी स्मृति भवनमा सम्पन्न भएको छ।
बैठकले पार्टीको १५औँ महाधिवेशनलाई लक्षित गर्दै सदस्यता व्यवस्थापन सम्बन्धी महत्वपूर्ण निर्णयहरू सार्वजनिक गरेको छ । बैठकले क्रियाशील सदस्यता नविकरण र नयाँ सदस्यता प्रविष्टिमा छुट भएका जिल्ला तथा क्षेत्रलाई एक साताको अतिरिक्त समय दिने निर्णय गरेको छ ।
यस अवधिमा डिजिटल प्रणालीमार्फत विवरण प्रविष्ट गरी शुल्कसहित केन्द्रीय कार्यालयमा बुझाउनुपर्ने व्यवस्था गरिएको छ । त्यसैगरी, जनसम्पर्क समितिहरूको अवस्थाअनुसार वर्गीकरण गरी समस्या पहिचान र समाधान गर्ने तथा सम्पन्न भइसकेका अधिवेशनका सदस्यता विवरणलाई विधानअनुसार अद्यावधिक गर्ने निर्णय पनि गरिएको छ ।
विदेशस्थित जनसम्पर्क समितिका लागि अनलाइन सदस्यता प्रणालीलाई निरन्तरता दिइने र सम्बन्धित समितिलाई त्यसबारे जानकारी गराइने व्यवस्था कायम राखिएको छ ।
बैठकले नेपाली नागरिकता भएका व्यक्तिहरूलाई जनसम्पर्क समिति सदस्यता तथा क्रियाशील सदस्यता उपलब्ध गराउन आवश्यक व्यवस्था गर्ने निर्णय गरेको छ भने अन्यको हकमा पार्टीको विधानअनुसार प्रक्रिया अपनाइनेछ ।
यसैबीच, नविकरण छुट भएका सदस्यहरूको हकमा केन्द्रीय स्तरबाटै एक साताका लागि नविकरण खुला गरिने र सम्बन्धित जिल्लालाई त्यसको जानकारी गराइने जनाइएको छ ।
साथै, विभिन्न कारणले रिक्त रहेका वडा सभापतिहरूको सदस्यता अद्यावधिक गर्न सम्बन्धित तहबाट तोकिएको व्यक्तिमार्फत प्रक्रिया अघि बढाउन सकिने व्यवस्था गरिएको छ । उक्त निर्णयहरू पार्टीका कार्यवाहक मुख्य सचिव कृष्णप्रसाद दुलालद्वारा जारी विज्ञप्तिमार्फत सार्वजनिक गरिएको हो l
