धनगढी । नेपाली कांग्रेसका सभापति गगनकुमार थापाले लोकतन्त्र, संविधान र जनअधिकारमाथि कुनै पनि प्रकारको नियन्त्रण वा हस्तक्षेप स्वीकार्य नहुने स्पष्ट चेतावनी दिएका छन्।
शनिबार धनगढीमा आयोजित पार्टी भेलालाई सम्बोधन गर्दै उनले शक्ति, सत्ता र संख्याको दम्भमा लोकतान्त्रिक मूल्य–मान्यतालाई कमजोर पार्ने प्रयास भए नेपाली कांग्रेस “सतिसाल” झैं अडिग भएर उभिने घोषणा गरे।
सभापति थापाले वर्तमान राजनीतिक परिस्थिति संवेदनशील रहेको उल्लेख गर्दै लोकतन्त्रको रक्षा कांग्रेसको ऐतिहासिक जिम्मेवारी भएको बताए। उनले प्रदेश सरकारहरू प्रभावकारी, उत्तरदायी र जनमुखी ढंगले सञ्चालन हुनुपर्नेमा जोड दिँदै पार्टीले सरकारको कामकारबाहीमाथि निरन्तर निगरानी राख्ने स्पष्ट पारे। साथै उनले तत्काल कांग्रेस–एमाले सहकार्य टुट्ने सम्भावना नरहेको उल्लेख गर्दै वैकल्पिक समीकरणको हल्लाबाट भ्रमित नहुन कार्यकर्तालाई आग्रह गरे।
पार्टी एकता, अनुशासन र संगठनात्मक निष्ठामाथि विशेष जोड दिएका थापाले नेपाली कांग्रेसको आधिकारिक सदस्य भएर चुनावमा पार्टीको चुनाव चिह्नबाहेक अन्यत्र मतदान गर्नु राजनीतिक र नैतिक दुवै हिसाबले अस्वीकार्य हुने बताए। “उम्मेदवार मन परेन भन्दै रूखबाहेक अन्य चिन्हमा मतदान गर्नु कांग्रेसको मूल मूल्यविरुद्धको कार्य हो,” उनले स्पष्ट शब्दमा भने।
उनले २१ फागुनको निर्वाचनमा पार्टीका आधिकारिक उम्मेदवारलाई असहयोग गर्ने जिम्मेवार नेताहरूलाई केही समयका लागि जिम्मेवारीमुक्त गरिने जानकारी पनि दिए। थापाले पार्टीभित्र अनुशासन, पारदर्शिता र उत्तरदायित्वलाई थप कडाइका साथ लागू गरिने संकेत गरे।
सभापति थापाले पूर्वसभापति शेरबहादुर देउवाको राजनीतिक योगदानको सम्मान गर्दै आफूहरू देउवाप्रति सदैव सम्मान र शुभेच्छा राख्ने बताए। उनले कांग्रेसभित्र पुस्तान्तरणसँगै अनुभव र ऊर्जाको समन्वय आवश्यक रहेको उल्लेख गर्दै पार्टीलाई नयाँ गति र स्पष्ट दिशातर्फ अघि बढाउने प्रतिबद्धता व्यक्त गरे।
