बुटवल । लुम्बिनी प्रदेशको प्रमुख व्यापारिक केन्द्र तथा प्रवेशद्वारका रूपमा परिचित बुटवलमा छाडा चौपायाको समस्या दिनप्रतिदिन जटिल बन्दै गएको छ । विशेषगरी मुख्य राजमार्ग, बजार क्षेत्र र फुटपाथमा ठूला साँढेहरू निर्धक्क रूपमा हिँडडुल गर्न थालेपछि पैदलयात्री, व्यवसायी तथा सवारी चालकहरू त्रसित बनेका छन् । व्यस्त सडकमा सवारी चापसँगै यस्ता छाडा पशुको उपस्थिति बढ्दा दुर्घटनाको जोखिमसमेत उच्च बनेको छ ।

बुटवलको मुख्य सडक र फुटपाथमा विशाल सिङ भएका साँढेहरू आरामसँग बस्ने र हिँड्ने दृश्य अहिले सामान्यजस्तै बनेको छ । फुटपाथ अवरुद्ध हुँदा सर्वसाधारण सडकबाटै हिँड्न बाध्य छन्, जसले गर्दा दुर्घटनाको सम्भावना झन् बढाएको छ । स्थानीयका अनुसार बालबालिका, वृद्धवृद्धा तथा महिलाहरू यस्ता चौपायाबाट सबैभन्दा बढी जोखिममा पर्ने गरेका छन् । रातिको समयमा सडकबीचमै चौपाया बस्ने गरेका कारण मोटरसाइकल तथा अन्य सवारी साधन दुर्घटनामा पर्ने घटना पनि बढ्दै गएको छ । 

स्थानीय व्यवसायीहरूका अनुसार नगरपालिकाले पटक–पटक व्यवस्थापनको आश्वासन दिए पनि समस्या समाधान हुन सकेको छैन । “सडकमा हिँड्दा कतिबेला साँढेले आक्रमण गर्छ भन्ने डर भइरहन्छ,” एक व्यवसायीले गुनासो गरे । “मुख्य बजारमै यस्तो अवस्था हुँदा नागरिक असुरक्षित महसुस गरिरहेका छन्,” उनले भने ।

बुटवल उपमहानगरपालिकाले छाडा चौपाया व्यवस्थापनका लागि कान्जीहाउस सञ्चालन र विभिन्न अभियान चलाए पनि प्रभावकारी नतिजा देखिन सकेको छैन । छिमेकी स्थानीय तहबाट रातारात पशु ल्याएर सडकमा छाड्ने प्रवृत्तिले समस्या थप जटिल बनेको स्थानीयको आरोप छ । “क्लिन र ग्रिन सिटी” को नारा बोकेको बुटवलमा सडक र फुटपाथमै साँढेको बिगबिगी देखिनु सहर व्यवस्थापनमाथि गम्भीर प्रश्न उठाउने विषय बनेको छ ।

सर्वसाधारणको सुरक्षा, सडक अनुशासन र सहरको सौन्दर्य जोगाउन सम्बन्धित निकायले तत्काल प्रभावकारी कदम चाल्नुपर्ने आवश्यकता देखिएको छ ।