काठमाडौं l नेपाली कांग्रेस सदस्यता व्यवस्थापन केन्द्रीय समितिले १५औँ महाधिवेशनको तयारीलाई तीव्र बनाउने क्रममा धनुषा जिल्लाको सदस्यता सम्बन्धी समस्या समाधानका लागि केन्द्रीय प्रतिनिधिका रूपमा अब्दुल सत्तारलाई जिम्मेवारी दिएको छ ।
सभापति गगनकुमार थापाको समुपस्थितिमा तथा समितिका संयोजक महामन्त्री प्रदीप पौडेलको अध्यक्षतामा सोमबार बी.पी. स्मृति भवन, ललितपुरमा बसेको बैठकले विभिन्न जिल्लामा देखिएका सदस्यता व्यवस्थापनका समस्या समाधान गर्न केन्द्रीय प्रतिनिधि खटाउने निर्णय गरेको हो । सोही निर्णयअनुसार धनुषामा अब्दुल सत्तारलाई विशेष जिम्मेवारी प्रदान गरिएको हो ।
बैठकले १५औँ महाधिवेशनलाई लक्षित गर्दै नयाँ क्रियाशील सदस्यता वितरण, नवीकरण तथा केन्द्रीय प्रणालीमा विवरण प्रविष्ट गर्ने काम २०८३ जेठ २१ गतेभित्र सम्पन्न गर्ने निर्णय समेत गरेको छ ।
यसैगरी, सातै प्रदेशमा सदस्यता अद्यावधिक कार्यलाई प्रभावकारी बनाउन केन्द्रीय पदाधिकारी तथा सदस्यहरूलाई विशेष जिम्मेवारी तोकिएको छ । कोशीमा डा. डिला संग्रौला, बागमतीमा बहादुर सिंह लामा, सुदूरपश्चिममा उदय शमशेर राणा, गण्डकीमा मुक्ताकुमारी यादव, कर्णालीमा जानकी सिंह, मधेशमा देवराज चालिसे र लुम्बिनीमा अमरसिंह पुनलाई जिम्मेवारी दिइएको छ ।
त्यस्तै, विभिन्न जिल्लामा सदस्यता व्यवस्थापन तथा समस्या समाधानका लागि डा. गोपाल दहित (बारा), आगेलु शेर्पा (सिराहा), राजीव ढुंगाना (सप्तरी), कुसुम थापा (सोलुखुम्बु), देवप्रसाद तिमिल्सिना (सर्लाही), तिलक रानाभाट (सुर्खेत), प्रमोदहरि गुरागाईं (महोत्तरी), टेकराज पौडेल (कपिलवस्तु), जगदीश नरसिंह केसी (सुनसरी), कमलकिशोर घिमिरे (रौतहट), कृष्ण रिजाल (पर्सा) र इश्वर अधिकारी (काठमाडौं) लाई समेत जिम्मेवारी तोकिएको कांग्रेसले जनाएको छ ।
बैठकले जनसम्पर्क समितिहरूको क्रियाशील सदस्यता अद्यावधिक, अधिवेशन व्यवस्थापन तथा सदस्यता सम्बन्धी समस्याको अध्ययन र समाधानका विषयमा समेत आवश्यक निर्णय गरेको छ ।
