गोरखा । नेपाली कांग्रेसका सभापति गगनकुमार थापा ले सरकार कुनै पार्टीको विधानअनुसार नभई देशको संविधान र कानुनअनुसार सञ्चालन हुनुपर्ने बताएका छन्।
मंगलबार गोरखास्थित नेपाली कांग्रेसको पार्टी कार्यालयमा आयोजित कार्यकर्ता भेटघाट कार्यक्रममा बोल्दै उनले पाँच वर्षका लागि जनादेश प्राप्त गरेको सरकार संविधानको मर्म र कानुनी व्यवस्थाअनुसार चल्नुपर्ने बताए।
राष्ट्रिय राजनीतिमा कांग्रेस प्रतिपक्षको भूमिकामा रहेको उल्लेख गर्दै थापाले कुनै दलको आन्तरिक गतिविधि कांग्रेसको सरोकारको विषय नभएको बताए। उनले भने, “सरकार चलाउने भनेको पार्टीको विधानले होइन, देशको विधान र संविधानले हो। संविधानअनुसार सरकार चल्छ कि चल्दैन भन्ने विषयमा खबरदारी गर्ने जिम्मेवारी प्रतिपक्षको हुन्छ।”
उनले सरकारले गरेका सकारात्मक काममा कांग्रेसले सहयोग गर्ने र कमजोरी देखिए प्रश्न उठाउने स्पष्ट पारे। लोकतान्त्रिक प्रणालीमा सशक्त प्रतिपक्षको भूमिका आवश्यक रहेको उनको भनाइ थियो।
थापाले २०४६ सालयता सत्ता र प्रतिपक्षमा रहेका राजनीतिक दलहरूले आफ्नो जिम्मेवारी पूर्ण रूपमा निर्वाह गर्न नसकेको टिप्पणी गर्दै सत्तामोहका कारण देशमा विभिन्न समस्या उत्पन्न भएको बताए।
सार्वजनिक पदमा बसेका व्यक्तिहरूको सम्पत्ति छानबिन हुनुपर्ने विषय कांग्रेसले पहिलेदेखि उठाउँदै आएको उल्लेख गर्दै उनले वर्तमान सरकारले थालेको प्रक्रिया सकारात्मक रहेको बताए। “हामी सम्पत्ति छानबिनका लागि खुला छौँ र आवश्यक सहयोग गर्न तयार छौँ,” उनले भने।
तर सम्पत्ति छानबिन आयोग गठनको प्रक्रियाबारे केही प्रश्न रहेको उल्लेख गर्दै आवश्यक ठाउँमा त्यसबारे जवाफ खोजिने बताए।
सम्पत्ति छानबिनको प्रसङ्गमा उनले सार्वजनिक पदाधिकारीहरूलाई पारदर्शी बन्न आग्रह गर्दै आफ्नो सम्पत्तिको स्रोत पुष्टि गर्ने साहस देखाउनुपर्ने धारणा राखे।
कार्यक्रममा उनले देशमा सुशासनको आवश्यकता औँल्याउँदै सरकारले पाँच वर्षभित्र जनतासमक्ष गरेका प्रतिबद्धता पूरा गर्नुपर्ने बताए। साथै, जनताले दिएको विश्वासलाई व्यवहारमा उतार्दै परिणाममुखी शासन सञ्चालन गर्न सरकारलाई आग्रह गरे।
