काठमाडौं । नेपाली कांग्रेसले प्रतिनिधिसभामा ७८ दिनदेखि गर्दै आएको विरोधका कार्यक्रम तत्कालका लागि स्थगित गर्ने निर्णय गरेको छ। सभामुख डोलप्रसाद अर्यालले प्रधानमन्त्री बालेन्द्र (बालेन) शाहलाई सांसदका प्रश्नको जवाफ दिन रुलिङ गरेपछि कांग्रेसले सदनको गतिरोध अन्त्य गर्ने निर्णय गरेको हो।
कांग्रेस सचेतक निश्कल राईले प्रधानमन्त्री शाहले प्रतिनिधिसभामा नेपालले भारतको जग्गा मिचेको अभिव्यक्ति दिएको विषयमा आफूहरूको गम्भीर आपत्ति रहेको बताए। उक्त अभिव्यक्ति राष्ट्रिय हितविपरीत भएको भन्दै कांग्रेसले ७८ दिनदेखि निरन्तर विरोध गर्दै आएको उनको भनाइ छ।
सभामुखले सोमबार गरेको रुलिङलाई कांग्रेसले सम्मान गर्दै तत्कालका लागि सदनमा नियमित अवरोध नगर्ने निर्णय गरेको राईले बताए। उनका अनुसार लोकतान्त्रिक व्यवस्थामा संवैधानिक तथा संसदीय संस्थाको गरिमा कायम राख्नुपर्ने भएकाले सभामुखको रुलिङलाई विश्वासका रूपमा लिइएको हो।
प्रतिनिधिसभा नियमावलीको नियम ५६ अनुसार प्रत्येक महिनाको पहिलो सात दिनभित्र प्रधानमन्त्रीसँग प्रत्यक्ष प्रश्नोत्तर कार्यक्रम सञ्चालन गर्नुपर्ने व्यवस्था छ। सोही व्यवस्थाअनुसार यसै साता प्रधानमन्त्री शाह संसद्मा उपस्थित भएर आफ्ना अभिव्यक्तिबारे स्पष्टीकरण दिने कांग्रेसको अपेक्षा छ।
तर प्रधानमन्त्रीले सन्तोषजनक जवाफ नदिए वा सभामुखको रुलिङ कार्यान्वयन नभए पुनः आन्दोलनमा उत्रिने चेतावनी कांग्रेसले दिएको छ।
