दमौली (तनहुँ) । भोटेकोशी बाढीका कारण ज्यान गुमाएका र त्रिशूली नदीमा फेला परेका तर हालसम्म पहिचान हुन नसकेका शवको व्यवस्थापन तनहुँको व्यास नगरपालिका–५ स्थित चैनपुर जङ्गल क्षेत्रमा गरिने भएको छ।
भविष्यमा समेत मृतकको पहिचान गर्न सकिने गरी आवश्यक कानुनी तथा वैज्ञानिक प्रक्रिया पूरा गरेर मात्रै शव व्यवस्थापन गर्न लागिएको हो। जिल्ला प्रशासन कार्यालय तनहुँका अनुसार शव व्यवस्थापनअघि डिएनए नमुना सङ्कलन, आवश्यक विवरण अभिलेखीकरण तथा अन्य पहिचानसम्बन्धी प्रक्रिया पूरा गरिनेछ।
तनहुँका प्रमुख जिल्ला अधिकारी शिवलाल तिवारीले शव व्यवस्थापनअघि आवश्यक कानुनी र वैज्ञानिक प्रक्रिया पूरा गरिने जानकारी दिए। उनका अनुसार परिवारले पछि दाबी गर्न सक्ने अवस्था तथा भविष्यमा पहिचान खुल्न सक्ने सम्भावनालाई ध्यानमा राखेर आवश्यक नमुना र विवरण सुरक्षित राखिनेछ।
३७ शव फेला, १४ दमौलीमा
बाढीपछि त्रिशूली नदी हुँदै तनहुँको क्षेत्रमा हालसम्म ३७ वटा शव फेला परेका छन्। तीमध्ये २४ शव आवश्यक प्रक्रिया पूरा गरी पोखरा पठाइएको छ भने १४ शव प्रदेश अस्पताल दमौलीमा राखिएको प्रशासनले जनाएको छ।
फेला परेका शवमध्ये पहिचान हुन नसकेकाको व्यवस्थापन गर्दा मृतकको पहिचानको सम्भावना पूर्ण रूपमा समाप्त नहोस् भन्ने उद्देश्यले डिएनएलगायतका वैज्ञानिक प्रमाण सुरक्षित राख्न लागिएको प्रशासनको भनाइ छ।
शव व्यवस्थापनको कार्य अत्यन्त संवेदनशील भएकाले स्वास्थ्यकर्मी, सुरक्षा निकाय तथा स्थानीय प्रशासनको समन्वयमा आवश्यक मापदण्ड पूरा गरी प्रक्रिया अघि बढाइने भएको छ।
विपद्का क्रममा ज्यान गुमाएकाको शव व्यवस्थापनसँगै उनीहरूको पहिचान र आफन्तसम्म सूचना पुर्याउने कार्यलाई पनि प्राथमिकतामा राखिएको प्रशासनले जनाएको छ।
