काठमाडाैं । काठमाडौँ महानगरपालिकाकी कार्यवाहक मेयर सुनिता डंगोलले नागरिकमैत्री शासन र भ्रष्टाचारमा शून्य सहनशीलतामार्फत शहीदका सपना पूरा गर्न काठमाडौँ महानगरपालिका प्रतिवद्ध रहेको बताएकी छन्।
जेनजी शहीद दिवसको अवसरमा उनले शहीद र घाइतेप्रति सम्मान प्रकट गर्दै आफू र महानगरका तर्फबाट प्रतिबद्धता व्यक्त गरेकी हुन्।
‘स्वाधीनता, स्वाभिमान र नागरिक अधिकार प्राप्तिका लागि विक्रम संवत् १९९७ सालदेखि गएको वर्षको आन्दोलनसम्मका विभिन्न कालखण्डमा अनेकौँ राजनीतिक क्रान्ति र संघर्षहरू भएका छन्,’ डंगोलले थपिन्, ‘आज हामीले उपभोग गरिरहेको लोकतान्त्रिक र संघीय शासन व्यवस्था यिनै महान आन्दोलनहरूको जगमा उभिएको उपलब्धि हो।’
काठमाडौँ हरेक ऐतिहासिक परिवर्तनको प्रत्यक्ष साक्षी रहेको उल्लेख गर्दै शासनसत्ता नागरिकको हित र सेवाका लागि हुनुपर्नेमा जोड दिइन्। ‘काठमाडौँ महानगरपालिका शहीदका सपना र नागरिकका अपेक्षाहरू पूरा गर्न दृढ संकल्पित छ,’ डंगोलले भनिन्।
उनले परिवर्तन केवल शब्दमा मात्र नभई नागरिकको दैनिक जीवनमा देखिनुपर्नेमा आफू सचेत रहेको बताइन्।
