चितवन । नारायणी नदीमा आएको बाढीले पुलको गैँडाकोटतर्फको पिलरमा अड्किएको राइनो क्रुज दुई वटा ठूला क्रेनको सहयोगमा सुरक्षित रूपमा निकालिएको छ।
बाढीका कारण पुलभन्दा केही माथि रोकिराखिएको क्रुज बग्दै नारायणी पुलको पिलरमा अड्किएको थियो। क्रुज निकाल्ने क्रममा पुलमा कुनै क्षति नहोस् भन्ने उद्देश्यले प्राविधिक टोली परिचालन गरिएको थियो। प्राविधिकको निगरानीमा दुई ठूला क्रेन प्रयोग गरी क्रुजलाई पिलरबाट निकालिएको हो।
नवलपुरको गैँडाकोटस्थित नारायणी नदीमा गत माघ १८ गतेदेखि राइनो क्रुज सञ्चालनमा आएको थियो। नवलपुर तथा आसपासका पर्यटकीय क्षेत्रलाई नयाँ र सम्भावनायुक्त गन्तव्यका रूपमा विकास गर्ने योजनासहित राइनो वाटर इन्टरटेनमेन्ट प्रालि र होटल रिभर क्राउन प्रालिले संयुक्त रूपमा करिब ५० करोड रुपैयाँ लगानी गरेका थिए।
साढे दुई तले क्रुज ९५ फिट लामो र २१ फिट चौडा रहेको छ। यसमा एकपटकमा करिब २०० जनासम्म यात्रु राख्न सक्ने क्षमता रहेको थियो।
